Сешанба кунги фотосуратларда кучли портлашлар ва Киевдаги кўп қаватли бинолар узра кўтарилаётган қуюқ тутун устунлари акс этган. Киев мери Виталий Кличконинг сўзларига кўра, бу ерда тунги зарбалар оқибатида тўрт киши ҳалок бўлган ва 65 киши, жумладан болалар жароҳатланган.
Кличконинг қўшимча қилишича, 24 қаватли турар жой биносига ракета келиб тушиши оқибатида бинонинг бир қисми қулаб тушган ва одамлар вайроналар остида қолиб кетган бўлиши мумкин. Шунингдек, ракета парчалари тушиши оқибатида ёнғин чиққан бинолар орасида 9 қаватли турар жой биноси ҳам бор.
Reutersʼнинг гувоҳлар сўзларига таяниб ёзишича, сешанба куни эрта тонгда ҳаво ҳужумидан мудофаа тизимларининг Россия ҳужумларини қайтараётган овози остида минглаб одамлар бошпана излаб Киев метросига оқиб келган.
Уларнинг баъзилари уй ҳайвонлари, шахсий буюмлари ва матрасларини ўзлари билан бирга олиб келишган. Тонг отгандан кеч ҳам пойтахтда яна портлаш товушлари эшитилиб турган.
Днипро губернатори Олександр Ганжа Днипро шаҳри ва унинг атрофида уюштирилган ракета ва дрон ҳужуми оқибатида етти киши ҳалок бўлгани ва 36 киши жароҳатланганини маълум қилди.
У ўзининг Telegram каналида вайрон бўлган турар жой бинолари, ёниб кетган автомобиллар ва шикастланган болалар майдончаси суратларини жойлаштирган. Губернатор барча ярадорлар шифохонага ётқизилгани ва уларнинг аҳволи ўртача оғирликда эканини қўшимча қилди.
