Британия миграция сиёсатини жиддий тарзда кучайтирмоқда

Буюк Британия ўзининг миграция сиёсатини сезиларли даражада кучайтиряпти. Хусусан, қочқинлар фақат 20 йил давомида мамлакатда яшагандан сўнггина яшаш учун рухсатнома олиш ҳақида илтимоснома бериши мумкин, деб маълум қилган Буюк Британия ички ишлар вазири Шабана Маҳмуд 16 ноябр куни чоп этилган The Sunday Times газетасига берган интервюсида.

Қайд этилишича, тегишли қонун қабул қилинганидан сўнг, янги қоидалар Буюк Британияга ноқонуний йўллар билан, масалан, қайиқларда ёки юк машиналарида келиб, кейин бошпана сўрайдиган муҳожирларга, шунингдек визаси амал қилиш муддати тугагандан кейин бошпана сўраб мурожаат қиладиганларга тааллуқли бўлади.

Шу тариқа, Буюк Британия яшаш учун рухсат олиш имконини кутиш муддати бўйича Европада энг узоқ муддатга эга давлатга айланади. Ҳозирча бу кўрсаткич бўйича Дания биринчиликни эгаллаб турибди, у ерда бундай имконият учун саккиз йил кутиш керак. Бирлашган Қиролликка қонуний йўл билан келган бошпана сўровчилар учун эса мамлакатда доимий яшаш учун рухсатнома сўраши мумкин бўлган чегара – 10 йилни ташкил қилади.

Шабана Маҳмуд, шунингдек, бошпана сўровчиларига моддий кўмак кўрсатиш мажбуриятини қонундан чиқариб ташлаш ниятида. Ўзини мустақил равишда таъминлашга қодир бўлса-да, буни қилмаётганлар ижтимоий уй-жой ва нафақалардан маҳрум этилади. Ҳуқуқбузарлик содир этганлар ҳам давлат ёрдамидан маҳрум бўлади.

Қочқин мақоми ҳар 30 ойда қайта кўриб чиқилади, деб таъкидлаган Маҳмуд. Хавфсиз деб топилган давлатлардан келганлар ўз ватанига қайтарилади. Унинг кузатишича, "бошпана олганларнинг кўпчилиги охир-оқибат Британияда бутун умрга қолган".

2005 йилда лейбористлар ҳукумати томонидан қабул қилинган ҳужжатга биноан, қочқинлар Буюк Британияда беш йил яшагандан сўнг умрбод яшаш учун рухсатнома сўраш ҳуқуқига эга. Бу ҳужжат уларга имтиёзлар ва ижтимоий тўловлар олиш ҳуқуқини беради ҳамда кейинчалик фуқаролик олиш йўлини очади.

Агар Буюк Британия ҳукумати тобора кучаяётган ноқонуний миграция муаммоси билан жиддий шуғулланмаса, мамлакат хавф остида қолади, дея огоҳлантирган Бирлашган Қироллик ички ишлар вазири. "Мен кўряпман – ва ҳамкасбларим ҳам буни кўраётганига ишонаман – ноқонуний миграция юртимизни парчаламоқда. Лейбористлар ҳукумати сифатида бизнинг вазифамиз – мамлакатимизни бирлаштириш, агар бу муаммони ҳал қилмасак, ўйлайманки, юртимиз янада кучлироқ бўлинган ҳолатга келиб қолади", — деб таъкидлаган Шабана Маҳмуд журналистлар билан суҳбатда.

2025 йил январдан июнгача бўлган даврда Буюк Британияда 111 минг киши бошпана сўраб мурожаат қилган. Январдан март охиригача эса шу жараён доирасида қиролликда 172 798 кишига яшаш учун рухсат берилгани ҳақида The Sunday Times газетаси ёзади.