Қўшимча функционаллар
-
Тунги кўриниш
Мундиал чиптасини сотиб олганлар АҚШ визасини тезроқ олади
АҚШ элчихоналари 2026 йилги футбол бўйича Жаҳон чемпионати чипталарини сотиб олганларга виза учун суҳбат белгилашда устуворлик беради. Бу ҳақда душанба куни президент Доналд Трамп эълон қилди.
Трамп билан бирга чиқиш қилган давлат котиби Марко Рубионинг аниқлик киритишича, чипта эгалари визага ариза берганидан кейин 6-8 ҳафта ичида суҳбатга кириши мумкин бўлади.
Шу билан бирга, чиптага эгалик виза олиш кафолатини бермайди.
“Сизнинг чиптангиз – бу виза эмас. У АҚШга киришингизга кафолат бермайди”, – деди Оқ уйдаги матбуот анжуманида Рубио.
Американинг бош дипломатига кўра, чипта эгаларининг аризаси ҳам одатий тартибда, бошқалар билан бир хил тарзда текширилади. “Ягона фарқ – биз уларнинг навбати келишини тезлаштирамиз”, деди у.
Футбол бўйича эркаклар ўртасида 2026 йилги Жаҳон чемпионати 2026 йил июн-июл ойларида АҚШ, Мексика ва Канада майдонларида бўлиб ўтади. Энг кўп ўйинлар Қўшма Штатлар ҳудудида бўлади.
17 ноябр куни Оқ уйдаги матбуот анжуманида қатнашган ФИФА президенти Жанни Инфантинонинг айтишича, мундиал ўйинларини кўриш учун АҚШга 10 миллионгача саёҳатчи келиши мумкин.
Аввалроқ АҚШ Давлат департаменти грин-карта лотереяси бу йил ўз вақтида бошланмаётганига изоҳ бериб, дастур сақлаб қолиниши, лекин унга техник ўзгаришлар киритилишини маълум қилганди. Лотерея қачондан бошланиши ҳали эълон қилинмаган.
