Ўзбекистон водород энергетикасида Британия билан ҳамкорликни йўлга қўйяпти

Ўзбекистон элчихонаси ҳамда Энергетика вазирлиги вакиллари Буюк Британиянинг Intelligent Energy компанияси тижорат директори Грег Харрис ва техник директори Крис Дадфилд билан онлайн мулоқот ўтказди, деб хабар бермоқда "Дунё" АА мухбири.

30 йиллик тажрибага эга бўлган Intelligent Energy водород энергиясини ишлаб чиқариш ва сотиш, шунингдек, ушбу тизим бўйича замонавий технологияларни жорий этишга ихтисослашган етакчи муҳандислик компанияси ҳисобланади.

Онлайн суҳбат чоғида Британия вакилларига Ўзбекистонда “яшил” энергетикани ривожлантириш доирасида амалга оширилаётган лойиҳалар, жумладан, “яшил” водород ишлаб чиқариш бўйича ташаббуслар ҳақида маълумот берилди. Ушбу йўналиш мамлакатнинг амалдаги энергетика стратегиясида устувор аҳамиятга эга экани таъкидланди.

Ўз навбатида, Intelligent Energy вакиллари компания фаолияти ва водороддан ёқилғи сифатида фойдаланишнинг афзалликлари юзасидан тўхталиб ўтди. Таъкидланишича, компания маҳсулотлари ҳозирда дунё бўйлаб автомобилсозлик, юк ташиш, дронлар, телекоммуникация ҳамда электр энергияси ишлаб чиқариш каби соҳаларда кенг қўлланмоқда.

Музокаралар давомида томонлар илғор водород ечимларига асосланган қўшма “яшил” лойиҳаларни амалга ошириш имкониятлари юзасидан фикр алмашди. Компания вакиллари Ўзбекистон билан водород технологиялари ва ёқилғи элементларини ишлаб чиқиш соҳасида ҳамкорликни янада ривожлантиришга тайёрлигини билдирди.