Reuters: Келлог Украина бўйича махсус вакил лавозимидан кетади

АҚШ президенти Доналд Трампнинг Украина бўйича махсус вакили Кит Келлог ваколат муддати якунланиши муносабати билан 2026 йил январ ойида маъмуриятни тарк этади. Reuters агентлиги чоршанба, 19 ноябр куни тўрт манбага таяниб ёзишича, Келлог истеъфога чиқиш нияти ҳақида ўзининг ишончли шахсларига маълум қилган.

Қайд этилишича, истеъфодаги генерал-лейтенантнинг кетиши Киев учун йўқотиш бўлади, чунки у Трамп маъмурияти таркибида Украина тарафдори сифатида энг муҳим шахслардан бири ҳисобланган. Келлог Украина фуқаролик инфратузилмасига қаратилган Россия ҳужумларини маъмуриятнинг бошқа вакилларига қараганда кескинроқ қоралаган.

ОАВ хабарларига кўра, Келлог АҚШ президентининг яна бир махсус вакили Стив Уиткофф билан низога борган. Уиткофф Украина томонидан ҳудудий имтиёзларни ҳам назарда тутувчи янги тинчлик режасини илгари сурмоқда. Президентнинг махсус вакили — ваколат муддати 360 кундан ошмайдиган вақтинчалик лавозим бўлиб, бу муддат Сенат томонидан узайтирилиши мумкин.

Орадан бир кун олдин Reuters ва қатор ғарб ОАВ Вашингтон Украинадан мамлакат шарқидаги баъзи ҳудудлардан воз кечишни, қуролли кучлар сонини қисқартиришни ва айрим турдаги қуроллардан бош тортишни талаб қилаётгани ҳақида хабар берди. Бу талаблар Россиянинг Украинага қарши урушига барҳам бериш бўйича Трамп маъмуриятининг янги режасида баён этилган.

Reuters суҳбатдошларининг таъкидлашича, Оқ уй Украина президенти Володимир Зеленскийга Вашингтон томонидан ишлаб чиқилган, 28 банддан иборат режани Киев қабул қилиши кераклигини тушунтирган. Аввалроқ хабар берилганидек, Трамп маъмурияти лойиҳасида тўртта асосий йўналиш ажратиб кўрсатилган: Украинада тинчлик, хавфсизлик кафолатлари, Европада хавфсизлик ва Вашингтоннинг Москва ҳамда Киев билан келгуси муносабатлари.