Оқ уй: Украина ва АҚШ янги тинчлик режаси устида биргаликда ишлаяпти

АҚШ президенти Доналд Трамп томонидан таклиф қилинган ва Россия ҳамда Украина билан муҳокама қилинаётган тинчлик режаси ҳар икки томон учун ҳам «яхши», деб маълум қилди Оқ уйнинг расмий вакили Кэролайн Ливитт 20 ноябр, пайшанба куни бўлиб ўтган брифингда.

Унинг сўзларига кўра, сўнгги бир ой давомида янги тинчлик режаси устида президентнинг махсус вакили Стив Уиткофф ва давлат котиби Марко Рубио «махфий равишда» иш олиб борган. Улар ҳам Украина, ҳам Россия билан мулоқот қилган. Трамп маъмурияти фикрича, ҳужжат «икки тараф учун ҳам қабул қилинадиган» бўлиши лозим.

Ливитт режанинг тафсилотларини ошкор этмади, чунки у ҳали ишлаб чиқиш босқичида экани ва унга ўзгартишлар киритилиши мумкинлигини қайд этди.

Украина президенти Володимир Зеленский кечки видеомурожаатида Telegram-канали орқали Украина ва АҚШ жамоалари «урушни якунлаш режасининг бандлари устида иш олиб боришини» маълум қилди.

Axios портали маълумотларига кўра, режанинг нусхасини Зеленскийга 20 ноябр куни Киевда бўлиб ўтган учрашув чоғида АҚШ армияси вазири Дэниел Дрисколл топширган. Режа нусхаси юборилгани ҳақида аввалроқ Украина президенти девони ҳам хабар берган эди. Манбанинг қайд этишича, томонлар ҳужжатни «қисқа муддат ичида» тайёрлашга келишиб олган.

Зеленский офисининг маълум қилишича, учрашув пайтида Украина раҳбари мамлакат халқи учун муҳим бўлган «асослар»ни баён қилган ва муҳокама якунлари бўйича томонлар режа бандларини «урушга муносиб якун беришига эришиш мақсадида» ишлаб чиқишга келишиб олган.

Олий Рада депутати Алексей Гончаренко 20 ноябр кечқурун 28 банддан иборат ҳужжатни эълон қилди. Унинг таъкидлашича, ушбу ҳужжат АҚШнинг тинчлик режаси ҳисобланади. Мазкур ҳужжатни бир неча украин ОАВ ҳам чоп этди. Шу билан бирга, бу ҳақиқатан ҳам Америка тинчлик режаси экани тўғрисида ҳеч қандай расмий тасдиқ йўқ.