«Украина жуда қийин танлов қаршисида» – Зеленский миллатга мурожаат қилди

Украина президенти Володимир Зеленский АҚШ тинчлик режасини қабул қилиши учун босим ўтказаётгани ҳақидаги хабарлар фонида украинларга мурожаат билан чиқди. «Медуза» ушбу мурожаатнинг умумий мазмунини келтирди.

«Ҳозир тарихимиздаги энг оғир дамлардан бири. Украина жуда қийин танлов қаршисида турибди: ёки қадр-қимматни йўқотиш, ёки асосий ҳамкорини йўқотиш хавфи. Ёки қийин 28 банд [ни қабул қилиш], ёки жуда оғир қаҳратон қиш ва бошқа хавф-хатарлар. Биздан икки марта ҳужум қилганларга ишонишни сўрашмоқда ва жавоб кутишмоқда.

Биз хотиржамлик кўрсатамиз, лекин шу билан бирга АҚШ ва ҳамкорлар билан тез иш олиб борамиз – ва душман Украина тинчликни хоҳламаяпти дейишига ўрин қолдирмаймиз. Мен тинчлик режасида иккита нарса – украинларнинг қадр-қиммати ва эркинлиги ҳисобга олиниши учун курашаман. Уруш тугаши, лекин Украина, Европа ва глобал дунё тугамаслиги учун ҳамма ишни қиламиз,.

Биз деярли тўрт йилдан бери дунёдаги энг йирик армиялардан бирини тўхтатиб турибмиз. Одамларимиз уруш тугашини истайди. Биз пўлатдек мустаҳкаммиз, лекин ҳар қандай, ҳатто энг мустаҳкам металл ҳам бардош бера олмайди. Урушнинг биринчи куни қочиб қолмадик. Шунинг ўзи ҳам қадр-қиммат, шу ҳам эркинлик. Россия учун энг қўрқинчлиси – украинларнинг бирдамлиги. Ҳозир бу бизга муносиб тинчлик учун ҳар қачонгидан ҳам кўпроқ керак. Одамлар, фуқаролар, сиёсатчилар – ҳаммамиз бирлашишимиз, жанжаллашишни, сиёсий ўйинларни бас қилишимиз керак. Ортимда Украина халқи турганини билсам, муносиб тинчликка эришишим осонроқ бўлади.

Келгуси ҳафта осон бўлмайди. Бизни ўзаро уриштириб қўйиш учун кўп босимлар бўлади. Душман биз ҳеч нарсага эриша олмаслигимиз учун қўлидан келган ҳамма ишни қилади. Унга бундай қилишга йўл қўйишга ҳаққимиз йўқ. Биз тинчлигимиз, қадр-қимматимиз, эркинлигимиз учун Украина ичида бирдам бўлишимиз керак. Мен ёлғиз эмаслигимга ишонаман ва биламан».