Трамп Украина бўйича янги махсус вакилини тайинлади

АҚШ армияси вазири Дэн Дрисколл президент Доналд Трампнинг Украина масаласи бўйича янги махсус вакили бўлди, деб хабар берди The Guardian манбалари.

Уларнинг сўзларига кўра, бир гуруҳ америкалик генераллар Дрисколл бошчилигида келаси ҳафта охирида Кремль билан тинчлик режасини муҳокама қилиш учун Москвага боради.

Дрисколл АҚШ вице-президенти Жей Ди Вэнснинг дўсти ва собиқ синфдоши. Оқ уйда уни Трамп жамоасининг энг самарали аъзоларидан бири сифатида таърифлашади. Аввалроқ Трамп Украина бўйича махсус вакил этиб тайинлаган ва унинг позициясини қўллаб-қувватлаган Кит Келлог истеъфога чиқишга тайёрланаётгани маълум бўлганди.

20 ноябрь куни Дрисколл бошчилигидаги АҚШ юқори мартабали ҳарбий амалдорлари делегацияси Киевда Украина президенти Володимир Зеленский билан музокаралар ўтказди. Шундан сўнг у Трампнинг тинчлик режасини муҳокама қилишга тайёрлигини билдирди. Шунингдек, делегация Европа вакиллари билан ҳам учрашди, деб ёзди Financial Times. Америкаликларнинг таъкидлашича, уларнинг режаси «деярли муҳокама қилинмаслиги лозим», чунки Украина «жуда ёмон аҳволда» бўлгани учун келишув тузишига тўғри келади.

21 ноябрь куни Зеленский халққа мурожаат билан чиқди. У Америка режасини изоҳлар экан, Украина олдида «ё қадр-қимматини йўқотиш, ёки асосий ҳамкорини йўқотиш хавфи» борлигини айтди ва ўз мамлакатига хиёнат қилмаслигини таъкидлади.