Украина АҚШ таклиф қилган тинчлик келишуви лойиҳасига рози бўлди – ОАВ

Украина ҳукумати Россиянинг қарийб тўрт йиллик ҳужумини тўхтатиш учун АҚШ президенти Доналд Трамп маъмурияти таклиф қилган тинчлик келишувига рози бўлди. Бу ҳақда CBS News америкалик амалдорнинг сўзларига таяниб ёзди.

У ва Украина президентининг миллий хавфсизлик бўйича маслаҳатчиси Рустем Умеров таклиф бўйича умумий келишувга эришилганини, бироқ тафсилотлар ҳали ишлаб чиқилиши кераклигини айтди.

«Украиналиклар тинчлик келишувига рози бўлди. Ҳал қилиниши керак бўлган баъзи кичик тафсилотлар бор, аммо улар тинчлик келишувига рози», деди америкалик амалдор.

Қайд этилишича, бу хабар АҚШ армияси вазири Дэн Дрисколл Россия расмийлари билан учрашиш учун Абу-Дабига борган вақтда пайдо бўлган.

Ўтган дам олиш кунлари Дрисколл, давлат котиби Марко Рубио, Трампнинг махсус вакили Стив Уиткофф, президентнинг куёви Жаред Кушнер, шунингдек, Украина ва Европа иттифоқчилари дипломатлари Швейцариянинг Женева шаҳрида бўлиб ўтган музокараларда иштирок этди. Натижада томонлар тинчлик режасини ўзгартирди - 28 банддан фақат 19 таси қолди.

Дрисколлнинг Россия расмийлари билан учрашуви ҳам ўтган ҳафта Украина пойтахтига ташрифидан кейин бўлиб ўтди.

Шанба куни НАТО аъзолари ва АҚШ бошқа иттифоқчиларидан бир гуруҳи қўшма баёнот эълон қилди, унда таклиф қилинган тинчлик режаси «қўшимча ишлаб чиқишни талаб қиладиган асос» деб аталди.

Оқ уй якшанба куни кечқурун АҚШ ва Украина расмийлари Женевадаги муҳокамалар натижасида «янгиланган ва такомиллаштирилган тинчлик асосини ишлаб чиққанини» айтди. Рубио Женевадаги учрашувлардан бирини «жуда мазмунли» деб атади, аммо «ҳали баъзи ишлар борлигини ва жамоалар ҳозир айнан шу билан шуғулланишини» қўшимча қилди.