Ҳонгконгдаги йирик турар-жой мажмуасида ёнғин чиқди

Чоршанба куни Ҳонгконгда, фасади бамбук ёғочлари билан ўралган 2 минг кишилик турар-жой мажмуасида йирик ёнғин рўй берди. Кўплаб одамлар ичкарида қамалиб қолган. Ҳозирча камида тўрт киши ҳалок бўлгани маълум.

Фото: Reuters

26 ноябрь куни Ҳонгконгнинг Таи По туманида жойлашган турар-жой мажмуасида бир нечта кўп қаватли уйларда йирик ёнғин кузатилди. Associated Press нашрининг маҳаллий расмийларга таяниб ёзишича, ёнғин оқибатида тўрт киши ҳалок бўлган, бошқалар ичкарида қамалиб қолган.

Воқеа жойидан олинган видеода бир-бирига яқин жойлашган камида бешта бино ёнаётгани, кўплаб квартираларнинг деразаларидан ёрқин алангалар ва тутун отилиб чиқаётгани кўринади. Ҳудудда кеч тушиши билан манзара янада яққол кўрингани акс этган. Ўт ўчирувчилар нарвонли юк машиналаридан кучли алангага сув йўналтирмоқда.

A fire engulfed several high-rise residential buildings in Hong Kong, leaving several dead and others trapped, according to police reports https://t.co/Ouyc0IA9I8 pic.twitter.com/8nlJwYKYVZ
— Reuters (@Reuters) November 26, 2025

Шиддатли ёнғин юз берган Таи По туманидаги мажмуа ташқи томонида бамбук ёғочлари ва яшил қурилиш тўрлари билан ўралгани кўринади. Маълумотларга кўра, ушбу уй-жой мажмуаси қарийб 2 000 та хонадондан иборат саккиз блокдан ташкил топган.

Ҳонгконг ҳукумати тўрт киши ҳалок бўлганини ва яна беш киши шифохонага ётқизилганини маълум қилди.

Ҳалок бўлганлар орасида бир ўт ўчирувчи ҳам бор, яна бир ўт ўчирувчи « кучли иссиқ оқибатидаги ҳолсизликдан» даволанмоқда, деди Ёнғин хизмати департаменти директори Энди Ëунг.

АП нашрининг ёзишича, полиция жабрланган биноларда қамалиб қолган одамлар ҳақида бир нечта мурожаатлар тушганини айтган, бироқ тафсилот бермаган.

Ёнғин тушдан кейин хабар қилинган. Расмийлар, у энг юқори даража – 5-даражали огоҳлантиришга кўтарилганини маълум қилди.

Таи По туманидаги маҳаллий амалдорлар ёнғин сабаб уй-жойсиз қолган одамлар учун вақтинчалик бошпаналар ташкил қилмоқда.

Нашрнинг ёзишича, бамбукдан ясалган конструкциялар — Ҳонгконгда қурилиш ва таъмирлаш лойиҳаларида кенг учрайди. Бироқ ҳукумат жорий йилда хавфсизлик билан боғлиқ хавотирлар сабаб жамоат лойиҳаларида уни босқичма-босқич бекор қилишни бошлашини айтганди.