Макрон: Россия янги тинчлик режасини муҳокама қилишга тайёр эмас

Россия Украина, АҚШ ва Европа вакиллари томонидан келишилган тинчлик режасининг янги вариантини муҳокама қилишга тайёр эмас. Бу ҳақда Украинага кўмак бераётган давлатлардан тузилган «кўнгиллилар коалицияси»нинг онлайн-йиғилиши якунидан сўнг, сешанба, 25 ноябр куни Франция президенти Эммануэл Макрон маълум қилди. Ушбу мажлисда АҚШ давлат котиби Марко Рубио биринчи бор иштирок этди.

«Россия ҳозир оташкесим тўғрисида келишишга яққол тайёр эмас», — дея Макроннинг сўзларини келтиради AFP агентлиги. Сиёсатчининг таъкидлашича, Москва янги тинчлик режасини «муҳокама қилишга тайёрлигини намоён этмади». Эммануэл Макрон Москвани музокараларга киришишга ундаш учун «босимни давом эттиришга» чақирди.

Бир неча соат олдин Франция президенти RTL ва M6 телеканалларига берган интервюсида уруш тугагандан сўнг Украинaга халқаро «хавфсизлик кучлари»ни юборишга чақирди. Унинг фикрича, бу кучлар Киев ёки Одессада жойлаштирилиши керак, улар «олд чизиқда» турмаслиги лозим.

«Француз, британ ва турк ҳарбийлари тинчлик шартномаси имзолангандан кейин, уруш пайти эмас, ўқув машғулотлари ўтказиш ва хавфсизликни таъминлаш операцияларини амалга ошириш учун у ерда бўлади. Худди биз НАТОнинг шарқий қанотидаги айрим мамлакатларда қилаётганимиз каби», — деди Эммануэл Макрон. У, шунингдек, «ҳавода, қуруқликда ёки денгизда бўладими, фаол ҳаракатларга тайёр эканини» аллақачон тахминан 20 та давлат билдирганини қўшимча қилди.

25 ноябр куни Буюк Британия бош вазири Кир Стармер ҳам Украинaга халқаро контингент киритиш ғоясини қўллаб-қувватлади. «Биз тайёрлаётган кўп миллатли кучлар бу жараёнда муҳим рол ўйнайди. Охирги ойларда жуда қаттиқ меҳнат қилган ҳарбий режалаштирувчиларимиз бу кучларнинг жанговар тайёргарлиги устида ишлашда давом этади», — деди Стармер.

Россия ТИВ раҳбари Сергей Лавров эса Макрон сўзларини «энг тажовузкор баёнот» деб атади ва унинг Киев ҳамда Одесса ҳақидаги таклифини «шунчаки хаёллар» сифатида баҳолади.

«Кўнгиллилар коалицияси»нинг 25 ноябрдаги онлайн-йиғилиши иштирокчилари «хавфсизлик кучлари» бўйича ишчи гуруҳ тузишга келишиб олди. Унга Франция ва Буюк Британия раҳбарлик қилади, шунингдек АҚШ ҳам иштирок этади, денгиз кучлари масалаларида эса Туркиянинг фаол иштироки кутиляпти. Эммануэл Макроннинг таъкидлашича, бу кучлар Россия ва Украина ўртасида келишувга эришилган тақдирда «украин армиясини мустаҳкамлаш учун» «мудофаа хатти-ҳаракатларининг иккинчи чизиғи»га айланиши керак.

«Босим Россия тушунадиган ягона тил бўлиб қолмоқда. Биз уни ҳақиқий равишда тинчлик йўлидан боришга тайёрлик намоён этилгунга қадар кучайтириб борамиз», — деб ёзди Еврокомиссия раиси Урсула фон дер Ляйен 25 ноябр куни бўлиб ўтган учрашув ҳақида Х ижтимоий тармоғида.