Қўшимча функционаллар
-
Тунги кўриниш
Трампнинг ўғли республикачиларга Трампликачилар бўлишни таклиф қилди
АҚШда Трампни қўллаб-қувватлаш даражаси пасаймоқда, ҳатто унинг MAGA ҳаракатидаги тарафдорлари ҳам ҳафсаласи пир бўлганини билдирмоқда. АҚШ президенти ўзининг энг содиқ издошларини Тпубликачилар, унинг ўғлини эса Трампликачилар деб аташни таклиф қилди.
Фото: AP
Президент Доналд Трампнинг сиёсатини қўллаб-қувватловчи АҚШ Республикачилар партияси аъзоларини янги сўз билан аташ мумкин. Бу ҳақда Трампнинг ўзи Truth Social платформасида ёзди. Унинг таъкидлашича, гап «деярли барча» партия аъзолари ҳақида кетмоқда.
- Балки, TEPUBLICAN? Ёки TPUBLICAN?, деб таклиф киритди президент. Инглиз тилида Республикачилар партияси Republican Party деб аталади.
Унинг ўғли кичик Доналд Трамп эса «Трампликачилар» (Trumplican) деб аташни таклиф қилди.
АҚШ президентининг маъқуллаш рейтинги инаугурациядан бери аста-секин пасайиб бормоқда. Ўнлаб ташкилотлар сўровлари натижаларини тўплаган The New York Times газетасининг ўртача ҳисоб-китобларига кўра, ҳозир Трампни 41 фоиз америкаликлар қўллаб-қувватламоқда, 55 фоизи унинг сиёсатини маъқулламайди. Анъанавий равишда республикачиларни қўллаб-қувватловчи Fox News телеканали ҳам Трампнинг машҳурлиги пасайганини таъкидлаяпти.
Сўнгги ҳафталарда Трамп ўзининг Make America Great Again (MAGA) ҳаракати аъзолари томонидан тез-тез танқид қилинмоқда. Ундаги энг кўзга кўринган шахслардан бири, конгрессмен Маржори Тейлор Грин миллиардер Жеффри Эпштейнга тегишли ҳужжатларни эълон қилишдан бош тортгани учун Трамп билан зиддиятга борди (кейинчалик президент ҳужжатларнинг эълон қилинишини қўллаб-қувватлади). Натижада, Грин Конгрессни тарк этишини эълон қилди ва Оқ уйни яна танқид қилди: иш ўринлари ноқонуний мигрантлар билан алмаштирилгани, АҚШ давлат қарзининг ошиши, америкаликларнинг солиқлари эвазига хорижий манфаатларни молиялаштириш, долларнинг харид қобилиятининг пасайишини таъкидлади.
Республикачиларнинг тўртдан бир қисми (25 фоиз) Трампнинг тариф сиёсатини маъқулламайди ва деярли ярми (47 фоиз) тарифлар инфляцияни кучайтиришини айтди, дейилади Washington Post ва ABC томонидан яқинда ўтказилган сўров натижаларида. Унинг собиқ маслаҳатчиси Стив Бэннон президентнинг «Америка биринчи ўринда» тамойилига зид равишда ташқи сиёсатга эътибор қаратаётганидан норозилик билдирган.
