Зеленскийнинг офиси раҳбари уйида тинтув ўтказилди

Украина Миллий аксилкоррупция бюроси (НАБУ) ва Ихтисослаштирилган аксилкоррупция прокуратураси (САП) ходимлари 28 ноябр куни эрталаб Киевнинг ҳукумат кварталида Украина президенти офиси раҳбари Андрей Ермакнинг уйини тинтув қилиш учун келишди. Бу ҳақда биринчи бўлиб «Украинская правда» ўз мухбирига таяниб хабар берди. Нашр журналистларига кўра, ҳукумат квартали ҳудудига 10 га яқин ходими кирган.

Кўп ўтмай, бюро ва Ермакнинг ўзи тинтув ўтказилганини тасдиқлади. Бюро хабарида тинтувларга «санкция берилган ва тергов доирасида ўтказилаётгани» айтилган. Гап қандай тергов ҳақида кетаётганига аниқлик киритилмади.

Ермак ўзининг телеграм-каналида НАБУ ва САП унинг уйида «процессуал ҳаракатлар олиб бораётгани» ҳақида ёзган. «Терговчиларга ҳеч қандай тўсиқ йўқ. Уларга квартирага тўлиқ кириш имконияти берилди, ҳуқуқ-тартибот идоралари ходимлари билан ҳамкорлик қилувчи адвокатларим ҳам ўша жойда. Мен томондан – тўлиқ ҳамкорлик қилинади», – деди Украина президенти офиси раҳбари.

Володимир Зеленский тинтув юзасидан ҳозирча изоҳ бермади.

Кейинроқ «Интерфакс-Украина», «РБК-Украина» ва «Украинская правда» ўз манбаларига таяниб ёзишича, Андрей Ермакнинг уйида ўтказилган тинтувлардан сўнг терговчилар ҳеч кимга гумонланувчи деб топилгани ҳақида хабар бермаган.

Financial Times журналисти Кристофер Миллер манбаларга таяниб, Ермакникидаги тинтувлар энергетика соҳасидаги коррупция иши бўйича тергов билан боғлиқлигини маълум қилди. Тинтувларнинг бу иш билан боғлиқлиги ҳақида «РБК-Украина» ҳам ёзган.

Ноябрь ойи бошида Миллий аксилкоррупция бюроси Украинадаги барча атом электр станцияларини бошқарувчи «Энергоатом» компаниясида кенг кўламли ўғирликлар фош этилганини эълон қилганди. Гап компаниянинг юзлаб миллион долларлик харидларидан «откат» олингани ҳақида кетмоқда. Аксилкоррупция идоралари версиясига кўра, кенг кўламли ўғирлик схемасининг яратувчиси ва асосий бенефициарларидан бири «Квартал 95» студиясининг ҳаммуассиси ва Володимир Зеленскийнинг сафдоши Тимур Миндич бўлган, юқори мартабали амалдорлар ҳам эҳтимолий бенефициарлар сифатида кўрсатилган. 10 ноябр куни терговчилар тинтув учун Миндичникига боришган. «Украинская правда» шундан бир неча соат олдин Исроилга жўнаб кетгани ҳақида ёзган (унда ушбу мамлакат фуқаролиги бор).

Коррупция можароси фонида Андрей Ермак истеъфога чиқиши мумкинлиги ҳақида хабарлар пайдо бўлганди. «Украинская правда» хабарига кўра, Володимир Зеленский атрофидаги одамлар унга президент офиси раҳбарини ишдан бўшатишни маслаҳат берган. 20 ноябр куни Зеленский «Халқ хизматкори» («Слуга народа») фракцияси вакиллари билан учрашув ўтказган ва унда Ермакни ишдан бўшатмоқчи эмаслигини маълум қилган.

Коррупция иши туфайли адлия вазири Герман Галушенко (у 2025 йил июлигача энергетика вазири бўлиб ишлаган) ва Украинанинг амалдаги энергетика вазири Светлана Гринчук истеъфога чиқарилди. Зеленский Миндич ва ишдаги яна бир фигурант, тадбиркор Олександр Сукерманга (у ҳам Украинадан чиқиб кетган) қарши санкциялар киритди. Миндич ва Сукерман қидирувга берилган. Володимир Зеленскийнинг ишончли вакиллари доирасига кирган Олексий Чернишов ҳам коррупция иши бўйича ҳибсга олинган. У 2024-2025 йилларда бош вазир ўринбосари лавозимида ишлаган.

Миндич иши бўйича Украина Миллий хавфсизлик ва мудофаа кенгаши (МХМК) котиби Рустем Умеров ҳам кўрсатма берди. Кенгаш баёнотига кўра, у «давлат арбобининг фаолиятига аралашиш факти бўйича очилган жиноий ишда гувоҳ сифатида кўрсатма бериш учун Миллий аксилкоррупция бюросига чақирилган». Аввалроқ Миндич Умеров мудофаа вазири лавозимида ишлаганида унга «таъсир ўтказишни ташкил қилгани» ҳақида хабар берилганди. Умеровнинг ўзи буни рад этган.