Берлин: Орбаннинг Кремлга ташрифи Европа позициясини ифодаламайди

Венгрия бош вазири Виктор Орбан Москвага "Европа мандатисиз" борди. Бу ҳақда Германия канцлери Фридрих Мерц жума куни, 28 ноябрда, Берлинда Словения бош вазири Роберт Голоб билан матбуот анжуманида маълум қилди.

У эслатиб ўтишича, 2024 йил июлида Орбан Россияга борганидан кейин — ротация бўйича ЕИда раислик Будапештга ўтиши ортидан — Россиянинг Украинага ҳаводан берган зарбалари кучайган. "Ўшандаги ташриф фақат омадсиз бўлиб қолмади. Ундан икки-уч кун ўтиб, Россия армияси томонидан, жумладан Украинадаги фуқаролик инфратузилмаси ва фуқаролик объектларига нисбатан энг кучли ҳужумлардан бири амалга оширилди", — деб эсга солди Мерц. "Умид қиламанки, бу сафар Россия томонидан бундай реакция кузатилмайди. Лекин у (Орбан — таҳр.) Европа мандатисиз ва биз билан буни мувофиқлаштирмасдан бормоқда", — дея таъкидлади Германия ҳукумати раҳбари.

Роберт Голоб эса ўз навбатида баёнотида дипломатик иборалар ишлатишни истамаслигини айтди. "Афтидан, Виктор Орбан бир қанча вақтдан буён Европа жамоаси таркибида ўйнамаяпти", — деди Словения бош вазири. "Биз бу ташрифдан ҳеч қандай фойда, ҳеч қандай афзаллик кутмаяпмиз", — дея қўшимча қилди у ва Орбан аввало ўз манфаатларидан келиб чиқиб ҳаракат қилаётганини таъкидлади.

Германия ҳукумати расмий вакили ўринбосари Штеффен Майер ГФР ҳукуматининг матбуот анжуманида DW илтимосига кўра Орбаннинг Россияга сафарига муносабат билдирди. "Биз ҳамкорларимиз билан биргаликда қатъий равишда Украина томонида турибмиз, ўт очишни имкони борича тезроқ тўхтатишни, шунингдек, Украина учун адолатли ва барқарор тинчликни, Европанинг хавфсизлигини талаб қиламиз. Бу канцлер олиб бораётган музокараларда ҳам, бошқа турли форматлар доирасидаги мулоқотларда ҳам бизнинг устувор масаламиз ҳисобланади", — деди Майер.

"Энг ҳал қилувчи нарса шуки, Владимир Путин музокаралар столига ўтириши керак… Мен шундай деган бўлардимки, қолган барча нарсаларни маълум маънода эътиборсиз қолдирамиз", — дея қўшимча қилди у.

DW'нинг "Европа Иттифоқи Орбанни ўзининг 'ҳамкори' деб ҳисоблайдими?" деган саволига жавоб берар экан, Штеффен Майер шундай деди: "Ишонч билан айта оламанки, Европа Иттифоқи доирасида, 'кўнгиллилар коалицияси'да биз доимо турли форматларда — масалан, европаликлар сифатида — Владимир Путинга нисбатан санкцион босимни кучайтириш йўлларини топиб келганмиз. Буни шундай мақсадда қилдикки, у, ниҳоят, музокаралар столига чин дилдан, фақат сўзда эмас, балки амалий жиҳатдан ҳам жиддий равишда ўтирсин".

"Бизнинг орамизда бошқача позициялар, турли фикрлар бўлган ҳолларда ҳам, биз, европаликлар, доимо бирдам ва қатъий тарзда ҳаракат қилиш, шунингдек, қарорлар қабул қилиш йўлларини топганмиз", — дея хулоса қилди Штеффен Майер.

Россия президенти Владимир Путин Орбанни Кремлда қабул қилди. Россия томонидан музокараларда президент ёрдамчиси Юрий Ушаков, вице-премьер Александр Новак ва ташқи ишлар вазири Сергей Лавров иштирок этди.

"Интерфакс" агентлиги хабарига кўра, Венгрия ҳукумати раҳбари Украинада уруш бошлангандан бери Россияга иккинчи марта келди.

Путин ўз навбатида АҚШ президенти Доналд Трамп бундан олдин Будапештни Россия–АҚШ саммити учун эҳтимолий майдон сифатида таклиф этганини эслатди. Агар бу учрашувни ўтказиш юзасидан келишувга эришилса, у Венгрия пойтахтида бўлиб ўтадиган саммитда иштирок этишдан мамнун бўлишини қўшимча қилди.

"Сизнинг мамлакатингизда мен билан АҚШ президенти ўртасида эҳтимолий учрашув ўтказиш таклифига шундай муносабат билдирганингиз учун раҳмат. Бу Доналднинг таклифи эди. У шундай деди: 'Бизда Венгрия билан яхши муносабатлар бор, сенинг Виктор билан, менинг ҳам яхши муносабатларим бор. Шу вариантни таклиф қиламан'. Албатта, биз мамнуният билан рози бўлдик", — дея Путиннинг сўзларини келтиради "Интерфакс".

Reuters агентлиги эслатишича, Венгрия бош вазири Путин билан бу сафар ўн тўртинчи марта учрашмоқда.