Путинга «ақл ўргатган» Уиткофф, тозалаш бошлаган Зеленский – ҳафта дайжести

Ассалому алайкум, азизлар. Бугун 30 ноябр, якшанба. Эртадан қиш, куздан эсон-омон чиқиб олдик. Ноябр одатдагидан илиқ келди, ёғингарчилик бўлмади. Бу яхши эмас, албатта, ҳар фасл ўз вақтида келгани яхши. Қиш баракали, ўзига ўхшаган бўлишига умид қиламиз. Қуруқ баҳор ва куздан кейин қишимиз ҳам қорсиз келса, янаги баҳорда сувсизлик янада жиддий муаммога айланади.

{Yii::t(}

Ўтказиб юбориш 6s

Ўтказиб юбориш

Ўзи шундоғам бизда сув билан боғлиқ ҳолат яхши эмас, етмаганига икки қўшнимиз дарёларимизни худди отасидан қолгандай тўсиб олган. Шу учун бор умидимиз ёмғир-у қордан, Яратган сув омборларимизни сувга тўлдирсин, меҳнаткаш халқимизнинг деҳқончилигига барака берсин, дарёларимизни тўсганлар доим бизга ҳавас қилган, бу ҳавасмандликлари давомли бўлсин. Биз одатдагидек ҳафтанинг энг муҳим воқеаларини биргаликда эслаймиз.

Дедлайн тугади

Америка президенти Трамп дедлайн белгилашни яхши кўради. Одатда Трамп белгилаган дедлайнларда у хоҳлаган иш бўлмайди, бу гал ҳам шунақа бўлди. Трамп вице-президент Вэнснинг синфдоши бўлган армия вазири Дэн Дрисколлни чиройли костюм кийгизиб Киевга юборди. «Бориб Зеленскийга айт, 27 ноябргача мана бу келишувни имзоласин, мен Миннатдорлик кунида фуқарога бир йил ичида тўққизинчи урушни тугатганимни эълон қилай», деди.

Лейтенант Дрисколл Киевга борди, Зеленскийга дўқ-пўписа қилди, ҳатто сўкинди, лекин ҳеч нимага эриша олмади. 27 ноябр ўтди, дедлайн тугади, Киев Россиянинг шартлари асосида тузилган мантиқсиз келишувни имзоламади, «кўприк Наврўзга битмади». Миннатдорлик куни ҳам ими-жимида ўтиб кетди, Ню Йоркда уч-тўрт ҳайвон шаклидаги шарни одамлар олдидан олиб ўтишди холос.

Америка сиёсати деганда бутун дунёда айтгани бўладиган, жиддий, салобатли дипломатияни тушунишарди. Лекин 2025 йил 20 январдан бошлаб асло бунақа эмас. Консерватор дейишга ҳам тил бормайдиган бир гуруҳ республикачилар Америка сиёсатининг оёғини осмондан қилиб юборишди. Бугунги Америка сиёсати худди бизнес империяга ўхшайди: Уиткофф унинг фирмалари Ғазода «дом» қуриб пул ишлаши учун урушни тугатишда воситачи бўлади, бир лейтенант синфдоши президентга яхши кўриниши учун бутун бошли мамлакат президентига сўкинади. Ғалати одамлар, ғалати сиёсат.

Уиткоффни тинглашди

Ҳафта можароси Америка ва Россия сиёсатидаги катта мулозимлар Стивен Уиткофф ва Юрий Ушаковнинг ўзаро телефон суҳбати тинглангани бўлди. Бу ишни ким қилгани аниқ эмас, лекин ким бўлса ҳам суҳбатни Bloomberg нашри орқали сиздирди.

Нашр суҳбатни матн кўринишида сўзма-сўз келтирди. Унда жуда ғалати гаплар айтилган. Хусусан, Уиткофф Путиннинг ёрдамчиси Ушаковга Россия президенти АҚШ президенти билан суҳбатда нималар дейиши кераклигини уқтирган. Шунингдек, Зеленский Оқ уйга келаётганидан хабардор қилиб, Путин Трампга бу учрашувгача қўнғироқ қилиши кераклигини айтган. Катта эҳтимол мана шу суҳбатдан кейин Путин чиндан Трампга қўнғироқ қилган ва АҚШ президенти Киевга Tomahawk ракеталарини бермаслигини эълон қилган. Эсингизда бўлса, ўшанда Трамп музокараларда силжиш борлиги ҳақида гапирганди. Бу силжиш Уиткофф ва Ушаковнинг телефон суҳбати бўлиб чиқди.

Зеленский тозалаш бошлади

Жума куни кечқурун Украина президенти Зеленский муҳим баёнот билан чиқди. Президент девони раҳбари Андрий Ермак ўз аризасига кўра ишдан кетди. Истеъфо Украина миллий аксилкоррупция бюроси НАБУ Ермакнинг уйида тинтув ўтказгани фонида содир бўлди. НАБУ Ермакнинг уйида уруш давридаги энг йирик коррупцион можаро – Миндич иши доирасида тинтув ўтказган. Тинтувдан кўп ўтмай Ермак ишдан бўшатилди.

Зеленский маъмурияти раҳбари Миндич иши очилиши билан ишдан кетиши кутилганди. Эсингизда бўлса, АҚШ президентининг вакили Уиткофф Европада Ермак билан учрашиши керак эди ва бу учрашув номаълум сабабга кўра бекор қилинганди. Ўшандаёқ Ермакнинг «қалами сингани» аниқ эди. Зеленский Ермакни истеъфога чиқариб, ўз атрофида жиддий тозалаш бошланганига ишора қилди.

Ермак 2020 йил 11 февралдан Зеленский маъмуриятини бошқариб келаётганди. Унгача ярим йил Зеленский маъмуриятини олигарх Коломойскийнинг собиқ маслаҳатчиси Андрий Богдан бошқарган. Ермакни «кулранг кардинал» деб ҳам аташарди. Чиндан у ўз ваколатига кирмайдиган ишлар билан, хусусан, Украина ташқи сиёсати билан шуғулланарди. Ермак Зеленскийни бошқаришга уринарди, дейдиганлар ҳам бор.

Ҳонконгда ёнғин

Ҳафта давомида Ҳонконгда даҳшатли ёнғин содир бўлди. 32 қаватли еттита ёнма-ён уй бир неча дақиқа ичида аланга ичида қолган. Бу комплексда камида икки минг киши яшаган, ҳозиргача 128 киши ўлгани аниқ, юзлаб одамлар билан ҳамон алоқа ўрнатилмаган.

Ёнғин бинони айлантириб ўраб чиқилган тўр ва бамбук ёнишидан бошланган. Бамбук жуда тез ёнадиган материал, шу сабаб Хитой каби давлатлар ундан биноларни ўраш учун фойдаланишни тақиқлаган. Лекин Ҳонконгдаги уйни қурувчилар негадир ҳам бамбук, ҳам тез ёнувчан тўр билан ўраб чиққан. Шамол сабаб ёнғин тезда тарқалган. Одамлар уйларда қамалиб қолган.

1980 йилда қурилган бу комплекс субсидия асосида бериладиган 40-45 квадратли арзон уйлардан иборат бўлган. Квартираларда ёнғиндан хабар берадиган ускуналар бўлмаган.

Албатта, бу ёнғинда қурувчилар, ташкилотчиларнинг айби катта, шамол бўлган, бошқа сабаблар, лекин худди дунёда ер қолмагандай ҳаммани осмонга қараб кўтарилган бетон уйларда яшашга мажбур қилишаётгани бу даҳшатнинг энг асосий сабаби, менимча.

Баланд-баланд уйларни зичлаштириб қуриб ташлашади, хўп, ерни тежарсиз, лекин ёнғинда тепа қаватдагилар қандай пастга тушади? Табиийки, қурувчига бунинг фарқи йўқ, у «дом»ларни сотиб, ўзи катта ҳовлисида яшаб юрибди. Заводлар машинасини парковка қилиши учун гектар-гектар ер, лекин оламлар гултожи инсон оиласи билан яшаши учун 40 квадрат бетон. Мана шунақа дунё, мана шунақа реаллик.

Путин уруш тугамаслигини айтди

Россия президенти Путин Қирғизистонга сафари тугаши арафасида одатдагидек журналистлар билан брифингда қатнашди. Уруш ҳақида саволга жавоб бераркан Путин ҳозир жанг майдонида кузатилаётган воқеалар Россияни қаноатлантиришини очиқ айтди. Шунингдек, уруш фақат Украина чекинса тугаши, бўлмаса давом этишини маълум қилди. Трамп эса Путинни ўзи ҳам ўқигани даргумон келишувни имзолашга кўндирмоқчи бўлиб юрибди...

Украинани Путиндан «яширишди»

Дарвоқе, Путиннинг Қирғизистонга ташрифи давомида қизиқ бир иш бўлди. Путинни расман кутиб олиш маросими Қирғизистон президенти қароргоҳида ўтказилди. Путин Бишкекка КХШТ саммитида иштирок этиш учун борганди. Буни қарангки, қирғизлар Украина элчихонаси учун Жапаров қароргоҳининг ёнидан жой беришган экан. Элчихонадаги Украина байроғи Қирғизистон президенти қароргоҳидан шундоқ кўриниб туради. Путин бу байроқни кўриб қолмасин деган мақсадда умуман кераксиз жойга катта экран ўрнатишди. Экранда шунчаки Путинга хуш келибсиз, деб ёзилганди, у ҳеч қандай функция бажармаган. Сиёсий ҳушёрликни қаранг...

Ўткир Жалолхонов тайёрлади.

Тасвирчи ва монтаж устаси – Фахриддин Ҳотамов.