«Яширин флот» танкерларида Россия нефти тўпланиб қолмоқда

Bloomberg маълумотларига кўра, Россия нефтни танкерларга юклаш ҳажмини камайтирмаяпти, аммо АҚШнинг янги санкциялари туфайли уни етказиб беришда қийинчиликлар юзага келган. Натижада «соядаги флот» таркибидаги танкерлар сузиб юрадиган нефт омборларига айланмоқда.

Фото: Vesa Moilanen/Lehtikuva/dpa

Октябр ойида АҚШ томонидан Россия нефтига нисбатан кенг кўламли санкциялар жорий этилганидан сўнг, Россияга ўз нефтига харидор топиши тобора қийинлашмоқда. Шу боис, Россиянинг «яширин флоти»га мансуб, денгизда турган танкерларида тобора кўпроқ нефт тўпланиб бормоқда, деб ёзади Bloomberg сешанба куни, 2 декабрда. Агентликка кўра, Россия санкцияларга қарамасдан ўз портларидан нефт экспорт қилиш ҳажмини аввалги даражада сақлаб қолмоқда, натижада танкерлар амалда сузиб юрадиган нефт омборларига айланиб қолган.

Шу билан бирга, ноябр ойида олти ҳафта ичида биринчи марта денгиз орқали Россия нефтини ташиш ҳажми ўсди. Bloomberg маълумотларига кўра, 30 ноябрда якунланган тўрт ҳафта ичида Россия кунига ўртача 3,46 миллион баррел нефт юклаб чиқарган — бу 23 ноябргача бўлган тўрт ҳафтадаги кўрсаткичдан тахминан 210 минг баррелга кўп. Бу кўрсаткич АҚШ "Роснефт" ва "Лукойл" компанияларига қарши санкциялар эълон қилганидан кейинги биринчи ўсишдир.

Ноябр охирига келиб Россиянинг «соядаги флот»ига мансуб танкерларида 180 миллион баррелдан ортиқ нефт тўпланган — бу август охирига нисбатан 21 фоизга кўп. Ўшанда, президент Доналд Трамп Россия нефтини қайта экспорт қилгани учун Ҳиндистонга нисбатан божларни оширган эди. Шунингдек, Россиянинг Тинч океани қирғоғидаги Козмино портидан Хитой портларигача бўлган йўлда танкерларнинг ҳаракат вақти бир ярим баробарга узайган: августда 8 кун бўлган йўл ноябрда 12 кундан кўпроқ вақт олмоқда.

Bloomberg’нинг қайд этишича, кемалар денгизда кўпроқ вақт ўтказмоқда — дастлаб белгиланган манзилларидан (Ҳиндистоннинг ғарбий қирғоқ портлари ёки Туркия) четлаб ўтиб, ёки портларда тушириш навбати келгунига қадар денгизда кутишга мажбур бўлмоқда. Таъминотчилар харажатлари ортмоқда, бу эса санкциялар туфайли аллақачон пасайган Россия нефти нархини яна тушириб, Россиянинг экспортдан оладиган даромадларини қисқартирмоқда.

Россия нефт компаниялари — "Лукойл" ва "Роснефт" ҳамда уларнинг 34 та шуъба корхоналари жорий йил октябр ойида Россиянинг Украинага қарши уруши давом этаётган бир пайтда Вашингтон ва Лондон томонидан санкциялар рўйхатига киритилган эди.

Ўшанда АҚШ урушни тугатиш бўйича тинчлик жараёнига Россиянинг "жиддий қизиқиши йўқлиги"ни таъкидлаган.