Мерцга Кремлдан "ҳужум": АҚШнинг Украина бўйича роли атрофида баҳс кучаймоқда

Россия президентининг маслаҳатчиси Кирилл Дмитриев Германия канцлери Фридрих Мерц Украинадаги урушни тўхтатиш бўйича АҚШнинг воситачилик саъй-ҳаракатлари самимийлигига шубҳа билдиргани ҳақидаги хабарларга кулги билан муносабат билдирди. Гап Зеленский ва ғарб сиёсатчилари билан бўлиб ўтган телефон конференцияси ҳақида кетмоқда.

“Ҳурматли Мерц, сен умуман ўйинда ҳам эмассан. Сен ўзингни ўзинг дисквалификация қилдинг — урушни қўзғатиш, тинчликка тўсиқ қўйиш, реал бўлмаган таклифлар, ғарб цивилизациясини ўз қўлинг билан йўқ қилиш, миграция ва қатьий аҳмоқлик орқали”, — деб ёзди Дмитриев 4 декабр, пайшанба куни кечқурун X ижтимоий тармоғида.

Бундан олдин Der Spiegel немис ҳафтаномаси хабар беришича, Мерц ва Франция президенти Эммануэл Макрон Зеленский билан бўлиб ўтган телефон конференцияси чоғида музокараларда АҚШнинг ролини шубҳа остига олган. Нашр маълумотларига кўра, Мерц Зеленскийни “кейинги кунларда жуда эҳтиёткор бўлиш кераклиги” ҳақида огоҳлантирган ва қўшимча қилиб: “Улар (яъни америкаликлар) ҳам сиз билан, ҳам биз билан ўйин ўйнаяпти”, деган ва шу тариқа АҚШнинг ҳаракатларини ифода этган.

Макрон эса, ўз навбатида, “АҚШ хавфсизлик кафолатлари юзасидан аниқлик киритмасдан, ҳудудлар масаласида Украинани сотиб кетиши мумкинлиги” хавфи борлиги ҳақида айтган. Der Spiegel таҳририяти ушбу махфий суҳбатга оид ёзма қайдлар ўзида мавжуд эканини қайд этди.

Германия ташқи ишлар вазири Йоханн Вадефул Москва томонидан Мерцга айтилган сўзларга хотиржам муносабат билдирди: “Ҳар ким ўз услубини ўзи танлайди. Кўплаб рус мансабдорларининг нутқи доимо маълум бир услуб доирасида қолмаслигини биз бир неча бор кўрганмиз. Бу бизга таъсир қилмайди”, — деди Вадефул 5 декабр, жума куни Берлиндаги матбуот анжуманида. Шу билан бирга, у шундай қўшимча қилди: “Бизда аниқ курс бор — биз Украина томонида турибмиз”.

АҚШнинг махсус вакили Стив Уиткофф ва АҚШ президенти Доналд Трампнинг куёви Жаред Кушнер 3 декабр куни Москвада Владимир Путин билан музокаралар ўтказди, 4 декабр куни эса Флоридада Украина томонидан бош музокарачи Рустем Умеров билан учрашув ташкиллаштирилди.

Трамп 3 декабр куни яна бир бор Путин “урушни тугатишни истаяпти”, деб баёнот берди. Ўз вакилларининг хулосаларини шарҳлар экан, у: “Бу — уларда пайдо бўлган таассурот”, — деди. Трамп, шунингдек, Уиткофф, Кушнер ва Путин учрашувини “жуда яхши” деб таърифлади.

Йоханн Вадефул 4 декабр куни яна бир бор Россия тинчликка интилмаётганини таъкидлади. Унинг айтишича, Москва жорий музокаралар жараёнида “ўз тажовузкор урушига барҳам бериш бўйича ҳеч қандай жиддий ниятлар намоён этмаяпти”, Путин эса Европага нисбатан риторикани кескинлаштирмоқда, максималистик талабларидан қайтмаяпти ва ҳарбий йўлга таянишда давом этмоқда.

Давом этаётган музокараларнинг асосини АҚШ томонидан ишлаб чиқилган Украинадаги урушни тўхтатиш режаси ташкил этади. Унинг дастлабки варианти Украина ва унинг Европа ҳамкорлари босими остида қайта кўриб чиқилди, чунки у Москва учун жуда ҳам қулай, деб баҳоланган эди.

28 банддан иборат дастлабки ҳужжатга кўра, Украина НАТОга аъзо бўлишдан воз кечиши, қуролли кучлар сонини қисқартириши ва Россияга бутун Донбассни, жумладан ҳали Россия томонидан оккупация қилинмаган ҳудудларни ҳам топшириши керак эди.