Шавкат Мирзиёев Конституция байрами арафасида 615 кишини афв этди

Президент Конституция куни муносабати билан қилмишига пушаймон бўлган ва тузалиш йўлига ўтган 615 нафар шахсни афв этди. Улардан 9 нафари хорижлик, 29 нафари аёл, 264 нафари 30 ёшгача бўлган (жумладан, икки нафар бола) ва тўққиз нафари тақиқланган ташкилотларга аъзо бўлган шахслардир.

Ўзбекистон президенти Шавкат Мирзиёев Ўзбекистон Республикаси Конституцияси қабул қилинганининг 33 йиллиги муносабати билан «Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги фармонни имзолади.

Фармонга мувофиқ, Ўзбекистон Республикаси Конституциясининг 109-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 615 нафар шахс афв этилди.

Афв этилган шахсларнинг 220 нафари асосий жазодан тўлиқ озод этилди, 123 нафари жазони ўташдан муддатидан илгари шартли озод қилинди, 97 нафарининг озодликдан маҳрум этиш жазоси енгилроқ жазо билан алмаштирилди. Шунингдек, 175 нафар шахсга тайинланган озодликдан маҳрум этиш жазосининг муддатлари қисқартирилди.

Афв этилганларнинг 9 нафарини чет эл фуқаролари, 29 нафарини аёл, 23 нафарини 60 ёшдан ошган эркаклар, 264 нафарини ёшлар (шулардан, 2 нафари вояга етмаганлар) ҳамда 9 нафарини тақиқланган ташкилотлар фаолиятида қатнашган шахслар ташкил этади.

«Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилди», – дейилади фармонга шарҳда.

Тайёрлаган: Азиз Қаршиев

#Конституция куни #афв этиш #Шавкат Мирзиёев