Зеленский: урушни тўхтатиш учун бандларни АҚШга топширишга тайёрмиз

«Биз ҳақиқий тинчликдан манфаатдормиз ва Американинг ўзи билан доимий алоқадамиз», — деб ёзди Украина президенти Володимир Зеленский сешанба, 9 декабр куни ижтимоий тармоқларда. «Ҳаммаси Россияда ўтирганлар урушни тўхтатиш ва урушни яна қайтaдан авж олдирмаслик учун самарали қадамлар қўйишга тайёрми-йўқми, шу нарсага боғлиқ», — дея таъкидлади у ва «шу фикрни музокара гуруҳлари таркибидаги ҳамкорлар ҳам бўлишишини» қўшимча қилди. Украина президентининг айтишича, «қайта ишланган ҳужжатлар»ни Вашингтонга юбориш «яқин вақт ичида» амалга оширилади.

Зеленский қайд этишича, Майамидан уч кунлик музокаралардан қайтган Украина делегацияси иштирокчилари билан уларнинг иш натижалари муҳокама қилинган: бу Лондонда «Европа ҳамкорларининг миллий хавфсизлик бўйича маслаҳатчилари даражасида» бўлиб ўтган. «Биз урушни тугатиш учун эҳтимолий қадамларнинг барча таркибий қисмлари устида жуда фаол ишлаяпмиз. Украина ва Европа компонентлари янада пухтароқ ишлаб чиқилди ва биз уларни америкалик ҳамкорларга тақдим этишга тайёрмиз. Америка томони билан биргаликда бу эҳтимолий қадамларни иложи борича самарали ва иложи борича тез амалга оширишни кутяпмиз», — дейилади Украина президенти баёнотида.

АҚШнинг 28 банддан иборат тинчлик режаси Украина томони билан маслаҳатлашувлардан сўнг қайта кўриб чиқилиб, 20 бандгача қисқартирилди, деб хабар берди Зеленский бир кун олдин кечқурун журналистларга. Матбуот анжумани Зеленский Лондондан Брюсселга учаётган самолёт бортида бўлиб ўтди. «28 банд бор эди, 20 та қолди. Бу йўналишни бир маромга солдик ва очиқчасига айтганда, мутлақо зид бўлган бандлар четга сурилди. Америкаликларнинг кайфияти, умумий олганда, муросани излашдан иборатдир. Албатта, ҳудудларга тааллуқли мураккаб масалалар бор. Бу ерда ҳозирча муроса топилгани йўқ», — дея Зеленскийнинг жавобларини келтирди «Интерфакс-Украина» агентлиги.

Журналистлар билан мулоқот чоғида Зеленский шуни таъкидладики, Украина ўз ҳудудларини ни мамлакат конституцияси, ни халқаро ҳуқуқ нуқтаи назаридан беришга ҳақли эмас. «Албатта, Россия ҳудудлар берилсин, деб қаттиқ туриб олган. Биз мутлақо ҳеч нарса бермоқчи эмасмиз — айнан шу учун курашяпмиз», — деб Зеленскийнинг сўзларини келтирди «Суспiльне» телеканали.

Зеленский хавфсизлик кафолатлари масаласига ҳам тўхталиб ўтди. «Биз олишимиз мумкин бўлган энг кучли хавфсизлик кафолатлари — бу АҚШдан бўлади. Албатта, агар бу Будапешт меморандуми эмас, бўш ваъдалар эмас, балки улар АҚШ Конгрессида овозга қўйиладиган, расмий ҳужжатга айланадиган кафолатлар бўлса», — деди у.

Зеленскийнинг сўзларига кўра, Украина томони тинчлик режаси устидаги ишни 9 декабр куни якунлайди, шундан кейин уни Вашингтонга топширади. «Менимча, режа тайёр бўлади, яна бир бор кўриб чиқамиз ва АҚШга юборамиз», — деди Зеленский кечқурунги чиқиши чоғида.

4–6 декабр кунлари Украина Миллий хавфсизлик ва мудофаа кенгаши котиби Рустем Умеров ва Украина Қуролли кучлари Бош штаби бошлиғи генерал Андрей Гнатов иштирокидаги Украина делегацияси Майамида АҚШ вакиллари билан музокаралар ўтказди. Америкалик томондан музокараларда АҚШ президенти Доналд Трампнинг махсус вакили Стивен Уиткофф ва Оқ уй раҳбарининг куёви Жаред Кушнер иштирок этди. Музокараларнинг учинчи куни уларга Зеленский ҳам қўшилди ва унинг сўзларига кўра, «узоқ ва мазмунли телефон суҳбати» ўтказди.