Адлия вазирлиги фейк хат ва ҳаволалардан огоҳлантирди

Адлия вазирлиги тадбиркорлар ва фуқаролар электрон почталарига вазирлик номидан юборилаётган сохта хатлар тарқалаётганини маълум қилиб, бундай хабарларга ишонмаслик ва улардаги ҳавола ҳамда QR-кодларни очмасликка чақирди.

Расмий маълумотга кўра, тадбиркорлар ва фуқаролар томонидан электрон почта манзилларига шубҳали хатлар келаётгани бўйича мурожаатлар келиб тушмоқда.

Адлия вазирлиги таъкидлашича:

бундай кўриниш ва мазмундаги хатлар вазирликка умуман алоқадор эмас;
улар фейк хабар ҳисобланади;
хатдаги ҳаволалар ва QR-кодлар фуқароларнинг шахсий маълумотларини ўғирлайдиган сохта сайтларга йўналтириши мумкин.

Расмий тарзда тадбиркорлар ва фуқаролардан фирибгарларга алданмаслик, шубҳали электрон хатлар ва “вазирлик номидан” юборилган телефон/онлайн хабарларга ишонмаслик, зарурат бўлганда эса маълумотни фақат Адлия вазирлигининг расмий каналлари орқали текшириб кўриш сўралган.