Украинанинг ЕИга аъзо бўлиши: устувор ислоҳотлар режаси эълон қилинди

Украинанинг Европа Иттифоқига (ЕИ) қўшилиш жараёни Венгриянинг тўсқинлигига қарамасдан давом этмоқда, деди Даниянинг Европа ишлари бўйича вазири Мари Берре.

“Мен Дания раислиги даврида кенгайиш бўйича янги ёндашувни қўллаганимиздан жуда фахрланаман: биз барча техник ишларни олдиндан бажаряпмиз (Бу ёндашув Брюсселда норасмий равишда frontloading деб аталди — таҳр.). Бу дегани — кенгайиш жараёни боши берк кўчага кириб қолмаган, Украина эса бажарилиши лозим бўлган барча техник ишлар бўйича олдинга силжиши мумкин”, — деди Берре пайшанба куни, 11 декабрда Лвивда ўтказилган ЕИ мамлакатлари Европа ишлари бўйича вазирларининг норасмий йиғилишида.

Шу билан бирга, Дания вазири музокара кластерларини очиш учун ЕИга аъзо барча давлатларнинг якдиллиги талаб этилишини эслатди ва ҳозирча “бу тўсқинликни (Венгриянинг — Таҳр.) бартараф этишнинг иложи бўлмагани”ни айтди.

“Тўсқинлик олиб ташланганда — ва мен бу албатта шундай бўлишига етарлича ишонаман — биз ушбу музокара кластерларини жуда тез оча оламиз ва ёпамиз ҳам, шу тариқа Украинани ЕИга аъзо бўлишга тайёр қиламиз”, — деб ишонтирди Мари Берре.

Будапештнинг музокара жараёнини қандай қилиб тўсишдан тўхтатиш мумкинлиги ҳақидаги саволга жавобан, Даниянинг Европа ишлари бўйича вазири шундай деди: агар мудофаа уруши олиб бораётган Украина ислоҳотларни давом эттирса, “босим шунчалик кучли бўладики, тўсқинлик абадий давом эта олмайди” ва уни “олиб ташлашга мажбур бўлишади”, чунки “жуда кўп давлатлар Украинани ЕИда кўришни истайди”.

Ўз навбатида, Лвивдаги учрашувда иштирок этган ЕИнинг кенгайиш масалалари бўйича еврокомиссари Марта Кос Украинанинг келажакда ЕИга аъзо бўлиши Еврокомиссия томонидан Киев учун Европа хавфсизлик кафолатларининг муҳим элементи сифатида кўрилаётганини таъкидлади.

“Бу — барқарор ва фаровон Украинага олиб борадиган энг ишончли йўл, шунингдек, ҳар қандай тинчлик келишуви барқарор бўлиши учун ҳал қилувчи аҳамиятга эга бўлади”, — деди Кос.

Еврокомиссар ислоҳотларни тез жорий этиш ва Украина қонунчилигини ЕИ талабларига мослаштиришни “айнан ўтган бир йил давомида Украина билан бирга ишлаб келган йўналиш” деб атади.

Коснинг сўзларига кўра, ЕИга аъзо давлатлар Украинадан кутаётган ислоҳотлар бўйича аниқ йўл-йўриқларни берган.

“Шу асосда ҳам Украина, ҳам Еврокомиссия — мен вакиллик қилаётган институция — техник музокараларни илгари суриш учун вазифалар рўйхатига эга. Яъни биз аниқ нимани қилиш кераклигини биламиз”, — деди еврокомиссар.

Кос аниқлик киритиб, ЕИ ва Украина аллақачон 10 та устувор ислоҳотдан иборат режани келишиб олганини маълум қилди:

“Уларнинг барчаси қонун устуворлигини мустаҳкамлаш, коррупцияга қарши кураш ва Украинага келажакда ЕИга кириш жараёни учун зарур бўлган кучли, ҳисобдор демократик институтларни барпо этишга қаратилган”.

“Албатта, кун тартибимизда молиявий кўмак, давлатлар ва Европа Иттифоқининг ҳарбий ёрдами каби кўплаб масалалар бор. Лекин бугунги кундаги муҳим элемент — кенгайиш жараёнидир”, — деди Лвивда Украинанинг евроатлантик интеграция бўйича бош вазир ўринбосари Тарас Качка ва шу билан бирга “ҳануз расмий якдиллик етишмаётгани”ни қайд этди.

Украина вазирининг таъкидлашича, ЕИга аъзо 26 давлат — Венгриядан ташқари — Украина ЕИга аъзо бўлиши бўйича музокара кластерларини очишни очиқ қўллаб-қувватламоқда. У техник ишларни эрта босқичда олдинга суришни ижобий баҳолади.

Качка, шунингдек, Украина томони барча кластерлар бўйича музокара позицияларини тайёрлашни якунлаганини, келаси ҳафта эса бу позицияларни ЕИ Кенгашига тақдим этиш учун барча расмиятчиликлар тугалланишини айтди.

Европа Иттифоқининг бу йилги сўнгги саммитининг (18–19 декабр, Брюссел) асосий масалаларидан бири Украина ЕИга аъзо бўлиши бўйича музокараларни бошлашни тўсиб турган ҳолатни бартараф этиш бўлади. Киев музокара кластерларини очиш учун зарур бўлган барча талабларни бажарганига қарамасдан, ушбу жараён Венгрия томонидан блокланган. Венгрия бош вазири Виктор Орбан мунтазам равишда Украина ЕИга аъзо бўлишига принципиал равишда қарши эканини айтиб келади.