«Мустақиллик майдони» — «Пахтакор» йўналишида поезд носозлик сабаб тўхтатилди

16 декабр куни соат 16:23 да «Мустақиллик майдони» бекатидан «Пахтакор» томон йўлга чиқиши керак бўлган 16-сонли ҳаракат таркибида эшик механизмида носозлик юзага келиб, йўловчилар бекатга туширилди ва поезд электродепога олиб кетилди.

Фото: Kun.uz

Маълум қилинишича, поезд йўловчиларни қабул қилиб, эшикларини ёпаётган пайтда йўловчилардан бири вагонга кириш мақсадида эшикни очишга уринган. Натижада эшикни ҳимоя қилувчи қурилма механизми ишдан чиққан.

Машинист вазиятни зудлик билан бартараф этганига қарамасдан, юзага келган носозлик кейинги бекатга етмасдан яна такрорланган. Шундан сўнг, йўриқнома талабларига мувофиқ, йўловчилар бекатга туширилиб, ҳаракат таркиби электродепога йўналтирилган.

Метрополитен йўловчиларидан хавфсизлик қоидаларига қатъий риоя этиш, эшиклар ёпилаётган вақтда вагонга киришга уринмаслик ва метро мулкига зиён етказмаслик сўралди. Қайд этилишича, эътиборсизлик йўловчиларнинг ўзлари ҳамда бошқа фуқаролар ҳаёти учун хавф туғдириши мумкин.

Тайёрлаган: Отабек Матназаров

#поезд