Қўшимча функционаллар
-
Тунги кўриниш
Путин: АҚШ Аляскада таклиф қилган муросаларга рози бўлдик
Путиннинг айтишича, Аляскада Трамп билан учрашув вақтида Россия томони Украина бўйича АҚШ таклиф қилган муросаларга розилик билдирган. У, шунингдек, РФ ҳокимияти “урушда одамлар ҳалок бўлиши учун ўзини жавобгар деб ҳисобламаслиги”ни айтди.
Россия 2025 йил август ойида Анкорижда бўлиб ўтган икки давлат раҳбарлари — Владимир Путин ва Доналд Трамп учрашувида АҚШ томони таклиф қилган муросаларга рози бўлган. Россия раҳбари бу ҳақда жума куни, 19 декабр куни “Тўғридан тўғри мулоқот”да маълум қилди.
“Москвадаги дастлабки учрашувларда бизга таклифлар берилди ва муайян муросаларга боришимизни сўрашди. Анкорижга келганимда, бу биз учун осон қарорлар бўлмаслигини айтдим. Аммо бизга таклиф қилинган муросаларга розимиз”, — деди Путин.
У қайд этишича, Трамп билан учрашувда Россия томони америкаликлар берган таклифларни “келишиб олган ва деярли қабул қилган”. “Шунинг учун биз ниманидир рад этяпмиз, деб айтиш — мутлақо нотўғри ва ҳеч қандай асосга эга эмас”, — деди Путин.
Унинг сўзларига кўра, Россия музокараларга ва урушни тинч йўллар билан якунлашга тайёр, ҳозир эса “тўлиқ ва бутунлай” Украина ва Европа мамлакатлари томонида.
Шу орада, 10 декабр куни Украина европалик иттифоқчилар билан маслаҳатлашувлардан сўнг Трампнинг тинчлик режасига тузатишларни АҚШга тақдим этган. Шунингдек, Европа давлатлари раҳбарлари, Украина президенти Володимир Зеленский ва АҚШ вакиллари иштирокидаги музокаралар 14–15 декабр кунлари Берлинда бўлиб ўтган. Музокараларнинг янги раунди — бу сафар АҚШ ва Россия ўртасида дам олиш кунлари Майамида ўтказилиши режалаштирилган.
Россия президенти, шунингдек, мамлакат ҳокимияти “урушда одамлар ҳалок бўлиши учун ўзини жавобгар деб ҳисобламаслиги”ни айтди, чунки унинг таъкидлашича, “бу урушни биз бошламаганмиз”. Путиннинг иддаосига кўра, Россия 2022 йил 24 февралда Украинага қарши амалга оширган кенг кўламли ҳужум — “Киев режими Ғарб давлатлари қўллаб-қувватлаган ҳолда бошлаган ўша урушни тугатиш учун” қуролли кучларни мажбурий қўллаш бўлган.
БМТ ноябр ойида маълум қилишича, фақат 2025 йил январ–октябр ойлари оралиғида РФнинг Украина шаҳарларига берган зарбалари оқибатида 548 нафар тинч аҳоли ҳалок бўлган, 3592 нафар киши яраланган.
Шу билан бирга, Россия президенти урушнинг бошланишини 2014 йилдаги “Украинада давлат тўнтариши” деб атади. Ўшанда Киевдаги Майдан ва мамлакатнинг бошқа ҳудудларида ойлаб давом этган оммавий намойишлардан кейин Украина президенти Виктор Янукович Олий Рада томонидан лавозимидан четлатилган, кейин эса РФга қочиб кетган. Россия Қримни қўшиб олган ва Донбассдаги сепаратистларни қўллаб-қувватлаган.
