Банклар синдикати орқали молиялаштириш: янги қоидалар жорий этилди

Адлия вазирлиги давлат рўйхатидан ўтказган мазкур низомга кўра, синдикатлашган кредит — қарз олувчини биргаликда молиялаштириш учун банк синдикати иштирокчилари томонидан ажратиладиган маблағ ҳисобланади. 

Низомда банк синдикати иштирокчилари доираси ҳам белгилаб қўйилган. Жумладан, банклар билан бир қаторда хорижий банклар, халқаро молия ташкилотлари ёки ўз давлат қонунчилигига мувофиқ кредит ажратишга ҳақли бўлган чет эл юридик шахслари ҳам синдикат иштирокчиси бўлиши мумкин. 

Тартибга кўра, қарз олувчи синдикатлашган молиялаштиришни олиш учун банкка ариза билан мурожаат қилади. Банк бу турдаги молиялаштиришни ажратиш мумкинлиги ҳақида қарор қабул қилса, қарз олувчи билан дастлабки шартларни келишиб олади. 

Шундан сўнг етакчи иштирокчи потенциал иштирокчиларга қарз олувчи ҳақида маълумотларни ўз ичига олган таклифни юборади. Банк синдикати эса иштирокчилар ўртасидаги ёзма келишув асосида тузилиб, унда ўзаро муносабатлар, ҳуқуқ ва мажбуриятлар белгиланади. 

Маълумот учун, мазкур ҳужжат Ўзбекистон Республикаси Марказий банки қарори билан тасдиқланган бўлиб, Адлия вазирлигида №3730 рақами билан рўйхатдан ўтказилган ва муддатсиз амал қилади.