Саноат зоналарида тугалланмаган объектлар янги иштирокчиларга берилади

Ҳукумат қарори (803-сон, 19.12.2025 й.) билан “Саноат зоналари иштирокчилари томонидан якунига етказилмаган лойиҳаларни амалга оширишга киритилган инвестицияларни баҳолаш ҳамда қурилиши тугалланмаган бино ва иншоотларда инвестиция киритиш ва қурилиш ишларини амалга оширган саноат зоналари иштирокчилари томонидан сарфланган маблағларни қоплаб бериш шарти билан янги иштирокчиларга бериш тартиби тўғрисида”ги вақтинчалик низом тасдиқланди.

Низомга кўра, саноат зонасида якунига етказилмаган лойиҳаларга киритилган инвестицияларни баҳолаш — инвестор саноат зонаси иштирокчиси мақомини йўқотгандан кейин, у лойиҳа доирасида амалга оширган харажатларни белгиланган шартлар асосида қоплаб бериш мақсадида амалга оширилади.

Шу билан бирга, саноат зонаси иштирокчиси мақомини йўқотган инвестор ва дирекция ўртасида келишув битими тузилиб, иштирокчи томонидан қурилиши бошланган, аммо тугалланмаган объектлар улар қурилишига сарфланган харажатларни қоплаш шарти билан дирекцияга ўтказилади.

Инвесторнинг иштирокчи мақоми қонунчиликда белгиланган тартибда бекор қилингач, ер участкаси қурилиши тугалланмаган объект билан бирга дирекцияга қайтарилиши қайд этилган.

Тартибга кўра, дирекция 2 ҳафта ичида тугалланмаган объектни давлат рўйхатидан ўтказиши, кейин эса 1 ой муддатда мазкур объектни баҳолашдан ўтказиши лозим.

Объект баҳолангандан сўнг, дирекция ер участкасини тугалланмаган объект билан биргаликда ёки объект қурилишини якунлаб, фойдаланишга рухсатнома олингандан кейин 3 кун ичида янги инвестиция лойиҳасини амалга ошириш учун электрон-онлайн аукционга жойлаштиради.