Доналд Трамп Шавкат Мирзиёевни G20 саммитига таклиф қилди

Ўзбекистон ва АҚШ президентлари ўртасида телефон мулоқоти бўлиб ўтди. Президент Шавкат Мирзиёевнинг матбуот хизматига кўра, мулоқотда стратегик шериклик муносабатларини чуқурлаштириш муҳокама қилинган, давлат раҳбари америкалик ҳамкасбини Ўзбекистонга таклиф қилган. Доналд Трамп эса Ўзбекистон ва Қозоғистон президентларини G20 саммитига таклиф этганини маълум қилди.

АҚШ президенти Доналд Трамп Ўзбекистон ва Қозоғистон президентлари билан телефон орқали мулоқот қилди ва улар келаси йилги Катта йигирматалик саммитига таклиф қилиниши айтди. Бу ҳақда у ўзининг Truth Social тармоғида маълум қилди.

2026 йилги G20 саммити бир йилдан кейин – 14-15 декабр кунлари АҚШнинг Майами шаҳрида бўлиб ўтиши кўзда тутилган.

Ўзбекистон президентининг матбуот хизматига кўра, Шавкат Мирзиёев ва Доналд Трамп ўртасидаги мулоқотда олий даражада эришилган келишувлар ижросининг бориши, шунингдек, Ўзбекистон – АҚШ стратегик шериклик муносабатларини янада ривожлантириш истиқболларини кўриб чиқилган.

"Томонлар олий даражадаги фаол мулоқотларни давом эттириш ниятини тасдиқлади ва амалий ҳамкорлик бўйича қўшма ташаббус ва дастурларни илгари суришга келишиб олди. Ўзбекистон президенти Америка етакчисини ўзи учун қулай муддатда мамлакатимизга ташриф билан келишга таклиф этди", - дейилади хабарда.