AP: Россия Венесуэладан дипломатлар оилаларини эвакуация қилишни бошлади

Европа разведкасидаги манбалар AP агентлигига айтишича, Россия дипломатлари Венесуэладаги вазиятни “жуда умидсиз” деб баҳоламоқда. РФ ТИВ эса эвакуацияни инкор этмоқда.

Фото: Валерий Шарифулин / ТАСС

Россия Венесуэла пойтахти Каракасдан ўз дипломатларининг оила аъзоларини эвакуация қилишни бошлади. Бу ҳақда 23 декабр, сешанба куни Associated Press (AP) агентлиги Европа разведкасидаги манбаларга таяниб хабар берди. Маълум қилинишича, эвакуация 19 декабр санасидаёқ бошланган. AP суҳбатдошига кўра, РФ Ташқи ишлар вазирлиги ходимлари Венесуэладаги вазиятни “жуда умидсиз” деб баҳоламоқда.

Ўз навбатида, Россия Ташқи ишлар вазирлиги дипломатлар оилаларини эвакуация қилиш ҳақидаги маълумот “ҳақиқатга тўғри келмайди”, деб баёнот берди. Вазирлик сўзларини тасдиқлаш учун Венесуэлада яшовчи россияликлар учун ўтказилган болалар янги йил байрами тадбиридан фотосуратлар ҳам эълон қилди.

Бундан бир кун олдин Венесуэла ташқи ишлар вазири Иван Хил РФ ТИВ раҳбари Сергей Лавров мамлакатини АҚШ томонидан нефт танкерларига нисбатан қўлланаётган блокада ва Вашингтоннинг расмий Каракасга босими муносабати билан қўллаб-қувватлашини билдирганини айтган.

Ҳафта охирида АҚШ президенти Доналд Трамп Венесуэладан АҚШга наркотрафик тўхтатилмагунча Мадуро ҳукуматига босимни давом эттиришини айтди.

2025 йил декабрда АҚШ халқаро сувларда Венесуэла нефти ташилаётган иккита танкерни қўлга олган. Америка ҳокимиятлари бу кемаларни “Венесуэланинг ‘соя флот’ининг бир қисми” деб атаган: улар, Вашингтон таъкидлашича, “ўғирланган нефтни контрабанда қилиш ва Мадуронинг наркотеррорчилик режимига маблағ йўналтириш” учун ишлатилган. 16 декабр куни Доналд Трамп Венесуэлага кириб-чиқаётган барча нефт танкерларига нисбатан “тўлиқ ва мутлақ” блокада қўллаш ҳақида буйруқ берганини маълум қилди.

Трамп маъмурияти Николас Мадурони легитим президент сифатида тан олмайди ва Венесуэла ҳукуматини наркотрафикка қарши курашда етарлича чора кўрмаётганликда ҳамда наркокартеллар билан алоқаларда айблайди. АҚШ Кариб денгизидаги иштирокини сезиларли кучайтирган: минтақага USS Gerald R. Ford авиаташувчиси ва камида яна саккизта ҳарбий кема, шунингдек F-35 қирувчилари юборилган. Америка ҳарбийлари, Вашингтон таъкидлашича, наркотрафикда иштирок этаётган кемаларга зарбалар бермоқда.

Кузда CNN телеканали Трамп Венесуэлада қуруқликдаги операция вариантни ҳам кўриб чиқаётгани, бироқ ҳозирча якуний қарор қабул қилмаганини хабар қилган.

2025 йил ноябр бошида АҚШ президенти Мадуронинг ҳокимиятдаги “кунлари саноқли” эканини айтган. Трамп маъмурияти Венесуэла президенти ва мамлакатдаги юқори лавозимли мансабдорлар тармоғини Cártel de los Soles (таржимаси: “Қуёшлар картели”) билан боғлайди.

2020 йилда, Доналд Трампнинг биринчи президентлик муддатида, АҚШ Венесуэла раҳбарини “наркотерроризм”да айблаб, уни қўлга олиш учун 15 млн доллар мукофот белгилаган. 2025 йил январда бу сумма 25 млн долларга, августда эса 50 млн долларга оширилган.