Украина бўйлаб ёпирилма зарба: қурбонлар бор, уч област электрдан узилди

Россиялик ҳарбийлар тунда ракета ва дронлар қўллаган ҳолда Украинани ўққа тутди. Жами ўндан ортиқ регион зарба остида қолган. Украина қуролли кучлари ҳаво кучларига кўра, ҳужумда турли типдаги 635 та дрон, Х-101 ва «Искандер-К» русумли 35 та қанотли ракета, шунингдек учта «Кинжал» ракетаси қўлланган. Мамлакат бўйлаб жами 30 та нуқтада қуроллар нишонга теккан.

Ҳужумнинг асосий нишони мамлакат энергия тизими бўлган. Украина энергетика вазирлиги бу 2025 йил бошидан буён тўққизинчи шундай кенг кўламли ҳужум бўлганини хабар қилган.

Украина бош вазири Юлия Свириденко ғарбий областлардаги энергетика объектлари кўпроқ зарар кўрганини маълум қилган.

Энергетика вазирлигига кўра, ҳужум оқибатида Ровен, Тернопол ва Хмельницкая областлари деярли тўлиқ электрдан узилган. Шунингдек, Винница, Одесса, Черниҳив, Житомир, Донецк, Днипропетровск ва Харкив областларидаги истеъмолчиларнинг бир қисми ҳам электр таъминотисиз қолган. Бутун мамлакат бўйлаб, ҳатто ҳужумга учрамаган регионларда ҳам электрни режали ўчириш жорий этилган.

Ҳудудий расмийларнинг ҳисоботларига кўра, камида уч киши ҳалок бўлган.

• Киевда дрон парчалари тушиши оқибатида беш қаватли уй шикастланган, беш киши жароҳатланган;
• Киев областида бир аёл ҳалок бўлган, яна уч киши яраланган;
• Житомир областида турар жой бинолари ва дўкон шикастланган, 2021 йилда туғилган бола ҳалок бўлган, яна беш киши жабрланган;
• Хмелницкая областининг Шепетовка шаҳрида кетма-кет ёнғинлар юзага келган, бир киши ҳалок бўлган.

Украина президенти Володимир Зеленский яна бир бор жаҳон ҳамжамиятини Россияга босимни кучайтиришга чақирди.

Россиянинг бу зарбаси Россиянинг устуворликлари ҳақида жуда аниқ сигнал беради. Рождество арафасидаги зарба, одамлар шунчаки қариндошлари билан, уйда, хавфсизликда бўлишни хоҳлашади. Бу амалда урушни якунлаш учун олиб борилаётган музокараларнинг авж палласида берилган зарба бўлди.

Россия мудофаа вазирлиги ёпирилма ҳаво ҳужуми уюштирилганини тасдиқлади. Вазирлик версиясига кўра, бу «юқори аниқликдаги қуроллар билан берилган зарба» бўлиб, унинг мақсадлари ҳарбий-саноат комплекси корхоналари ва уларнинг фаолиятини таъминловчи энергетика объектлари бўлган.

Бу Россия армиясининг декабр ойи бошидан бери камида тўртинчи ёпирилма ҳужуми бўлиб, бу ҳужумларнинг барчаси Украина энергетика тизимига қарши қаратилган. 6 декабрда олти, 13 декабрда тўққиз ҳудуд зарба остида қолганди. 18 декабр куни эса бешта област бўйлаб зарбалар берилган, натижада 180 мингдан ортиқ уйлар электрсиз қолганди.