Краснодар ўлкасида дрон зарбасидан кейин нефт маҳсулотлари ёниб кетди

Краснодар ўлкасидаги Темрюк денгиз порти 25 декабр, пайшанба кунига ўтар кечаси учувчисиз аппаратлар (дрон) ҳужумига учради. Бу ҳақда Россия жанубидаги минтақанинг тезкор штаби хабар қилди.

Ҳужум натижасида катта кўламли ёнғин чиққан бўлиб, у тахминан 2 минг кв. метр майдонни қамраб олган. “Ёнғинни ўчиришга 70 нафар одам ва 18 та техника бирлиги жалб қилинган, шу жумладан Краснодар ўлкаси бўйича РФ ФВВ Бош бошқармаси ходимлари ҳам”, — дейилади хабарда.

Нефт маҳсулотлари сақланадиган икки резервуар ёнган. Дастлабки маълумотларга кўра, жабрланганлар йўқ.

Азов денгизининг Темрюк қўлтиғида жойлашган Темрюк денгиз порти “Мечел” гуруҳига тегишли. Порт сайтида қайд этилишича, унинг фаолияти умумий юклар, сочма ва қуюқ юкларни қайта юклаш билан, шунингдек, ишлаб чиқариш ва омбор қувватларини ижарага бериш билан боғлиқ. Темрюк Россия жанубида суюлтирилган углеводород газини экспорт қилиш учун асосий порт ҳисобланади, шу билан бирга нефт юкларини жўнатишда ҳам қўлланади.

5 декабр куни ҳам Темрюк порти украин дронлари ҳужумига учраган эди. Ўшанда ҳам портда ёнғин чиққан ва уни ўчиришга 32 киши ҳамда 8 та техника бирлиги жалб қилинган.

Ноябр ойида Украина Новороссийск портига икки марта зарба берган. 14 ноябр кунги ҳужум натижасида нефт базаси ва соҳил иншоотлари шикастланган, шундан сўнг “Транснефть” портга нефт қуйишни тўхтатган.

10 ноябр куни Украина экипажсиз катерлари (денгиз дронлари) Қора денгиздаги энг йирик нефт қуйиш терминалларидан бири жойлашган Туапсе денгиз портига ҳужум қилган. Катерлардан бири соҳил чизиғи ёнида портлаган. 2 ноябр куни ҳам Туапсе дронлар ҳужумига учраган, шундан кейин терминал инфратузилмаси ва пирс ёнидаги танкер шикастланган. Шундан сўнг “Роснефть”га қарашли Туапсе нефтни қайта ишлаш заводи иши тўхтатилган.