Рим папаси Россияни Рождествода ўт очишни тўхтатишга чақирди

Рим папаси Лев XIV католик Рождество муносабати билан бутун дунёда умумий сулҳ ўрнатишга чақирди. “Мен яна бир бор ўз илтимосим билан барча эзгу ниятли одамларга мурожаат қиламан: камида битта тинчлик кунига — ҳеч бўлмаса байрамда ҳурмат билан ёндашинг”, — деди католик черкови раҳбари сешанба, 23 декабр куни кечқурун Рим яқинидаги Кастел-Гандолфодаги ўз қароргоҳида журналистларга.

“Мени жуда ранжитаётган нарсалардан бири — Россия, афтидан, ўт очишни тўхтатиш талаби/чақириғини рад этгани”, — деди Рим папаси.

Россия 2022 йил февралда Украинага қарши қуролли босқинни бошлаганидан бери ўт очишни тўхтатиш бўйича таклифларни бир неча бор рад этган. Украинада тинчлик йўли билан ҳал этиш бўйича АҚШнинг Флорида штатида ўтган дам олиш кунлари қайта бошланган музокараларда ҳам силжиш бўлмади. Сешанба куни Украина Россия қўшинлари билан қаттиқ жанглардан сўнг Донецк вилоятидаги стратегик жиҳатдан муҳим Северск шаҳридан чекинишини эълон қилди.

“Мен улар қулоқ солишига ва бутун дунёда 24 соат тинчлик бўлишига умид қиламан”, — деб таъкидлади Лев XIV дунёдаги можаролар ҳақида сўзлар экан.

Понтифик декабр бошида Италияда Украина президенти Володимир Зеленскийни қабул қилган эди. Зеленскийнинг Украинани зиёрат қилиш таклифини қабул қиладими, деган саволга Лев XIV кейинроқ: “Умид қиламан”, — деб жавоб берган. Шу билан бирга, у бундай сафар қачон амалга ошиши мумкинлигини айта олмаслигини қўшимча қилди.