Зеленский: “Уиткофф ва Кушнер билан жуда яхши суҳбат бўлди”

Украина президенти Володимир Зеленский АҚШ махсус вакили Стив Уиткофф ва АҚШ президенти маслаҳатчиси Жаред Кушнер билан “жуда яхши” телефон суҳбати ўтказганини маълум қилди. “Ишнинг айрим муҳим тафсилотларини муҳокама қилдик. Биргаликдаги натижа ва давомий тинчлик йўлида иш бериши мумкин бўлган яхши ғоялар бор”, — деб ёзди у 25 декабр, пайшанба куни X платформасидаги микроблогида.

Зеленский Уиткофф ва Кушнерга “конструктив ёндашув, жадал иш ҳамда украиналикларни Рождество билан табриклаган яхши сўзлари” учун миннатдорлик билдирди. Украина президенти таъкидлашича: “Биз ҳақиқатан ҳам 24/7 режимида ишлаяпмиз — Россиянинг Украинага қарши бу урушини якунлашни яқинлаштириш ва барча ҳужжатлар ҳамда қадамларни реалистик, самарали ва ишончли қилиш учун”.

Бундан бир кун олдин Зеленский Украина АҚШ ва Киев келишган, Украинадаги урушни тўхтатишга қаратилган режанинг охирги вариантида айрим ён беришларга эришганини айтган эди. Айни пайтда бу ҳужжат Москвада ўрганилмоқда.

Зеленский тақдим этган 20 банддан иборат режада ҳозирги фронт чизиғини музлатиш назарда тутилган. Бир вақтнинг ўзида у қўшинларни ортга тортиш ва демилитаризация қилинган ҳудудларни ташкил этиш учун йўл очади.