Украинларнинг байрам «тилаги», намоз ўқиётган фаластинликка ҳужум – ҳафта дайжести

Ассалому алайкум, азизлар. Бугун 28 декабр, якшанба. Ҳафта давомида Зеленский шов-шувли табрик йўллади, Путин Раҳмонга ҳамдардлик билдирди, Америка – Беларус келишувида кулгили тафсилотлар пайдо бўлди. Қуйида ҳафтанинг муҳим воқеаларини биргаликда эслаймиз.

{Yii::t(}

Ўтказиб юбориш 6s

Ўтказиб юбориш

Ҳафта тилаги

Ҳафта давомида барча насроний давлатлар етакчилари фуқарони рождество билан табриклади. Лекин ҳамма бир кишининг – Украина президенти Володимир Зеленскийнинг табригини муҳокама қилмоқда. Урушаётган, мустақиллигини сақлаб қолиш учун ҳимояланаётган давлат лидерининг сўзлари бошқаларникидан таъсирлироқ бўлиши табиий. Ватани ерларини сақлаб қолиш учун жанг қилаётган қўмондон чиройли гапириши ҳам шарт эмас, унинг гапида шундоғам дард бўлади.

Зеленскийнинг табриги чиндан жуда таъсирли чиқди. Охирги тўрт йилда Украина ўз тарихидаги энг жиддий синовдан ўтмоқда. Мамлакат бутун бошли мустақиллигини бой бериши мумкин. Дунёдаги энг қудратли давлат ҳам дипломатия майдонида Украина душмани томонга ўтган бир вақтда Зеленский асабларини жиловлаши қанчалик қийин бўлишини тасаввур қилаверинг. Балки шу учундир, рождество табригида Зеленский Россия президенти Путинни назарда тутиб, «барча украинлар унинг ўлимини исташини» айтди.

Бир давлат президенти байрам табригида бошқа давлат президентига ўлим тилашини ҳеч қачон кўрмагандим. Зеленский табрикда бундай дегани икки давлат ўртасидаги нафрат қанчалик чўққига чиққанини кўрсатди.

Трамп ва Зеленский кўришади

Украина президенти Володимир Зеленский америкалик ҳамкасби Доналд Трамп билан навбатдаги марта кўришадиган бўлди. Учрашув бугун тун ярмидан оққанда Трампнинг Флоридадаги қароргоҳида ўтказилади. Зеленский «янги йилгача кўп нарса ҳал бўлиши мумкинлигини» айтди. Учрашув Оқ уйда эмас, Трампнинг шахсий резиденциясида ўтишига қараганда, анча эркин форматда бўлади. Жиддий келишувлар айнан мана шундай форматдаги учрашувларда амалга ошади ахир.

Зеленскийнинг айтишича, Трамп таклиф қилаётган тинчлик режаси 20 бандгача қисқартирилган. Украина президенти агар Россия камида 60 кунга ўт очишни тўхтатишга рози бўлса, Трампнинг таклифини референдумга қўйишга тайёрлигини айтди. Лекин ҳали Россия бу келишувга рози бўлиши аниқ эмас, келишувда Украина жиддий ҳудудий ёнбериши кўзда тутилган бўлса-да.

ЦАҲАЛ аскари намоз ўқиётган фаластинликка ташланди

Ҳафта давомида Фаластинга тегишли Ўрдун дарёсининг Ғарбий соҳилида олинган даҳшатли видео тарқалди. Рамаллоҳда олинган кадрда қуролланган шахс йўл четида намоз ўқиётган одам устига квадроцикл ҳайдаб, уни суриб юборган. Кейин намоз ўқиётган одамга ва ҳолатни видеога олмоқчи бўлган ҳайдовчилардан бирига дўқлаган. Маълум бўлишича, қуролланган шахс Исроил мудофаа армияси ЦАҲАЛ захирадаги ҳарбийси, намоз ўқиётган одам фаластинлик йўловчи бўлган.

Исроил томони видео Фаластин нашрларида тарқалганидан кейин унга муносабат билдириб, видеодаги шахс қўлга олиниб, беш кун уй қамоғига ҳукм қилинганини маълум қилди. Лекин бу ҳақда эълон қилинганда, намоз ўқиётган фаластинликка ҳужум қилган исроиллик гўёки жазони ўтаб бўлган экан. Яъни, у чиндан жазоланганига ҳеч қандай исбот йўқ. ЦАҲАЛ ҳолатга муносабат билдирди: жиноятчи хизматдан четлаштирилиб, қуроли олиб қўйилибди.

Маълумот учун, Қуддус Исроил томонидан қисман босиб олингани сабаб Рамаллоҳ амалда Фаластин мухторияти пойтахти ҳисобланади.

Руслар Купянск назоратини бой бердими?

Украинанинг Харкив областида жойлашган Купянск шаҳри охирги вақтларда фронтдаги энг муҳим стратегик манзилга айланди. Россия томони камида уч марта шаҳар эгаллангани ҳақида эълон қилган. Биринчи баёнот ноябр ойида берилган, Путин камида икки марта шаҳар тўлиқ руслар назоратида эканини айтганди.

Лекин декабр бошида Украина президенти Володимир Зеленский Купянск стелласи олдида видео эълон қилиб, русларнинг баёнотларини шубҳа остида қолдирди. Россияда «Зеленский Купянскка боргани фейклиги» ҳақида роса ёзишди, лекин видео амалда шаҳардаги асл вазиятни кўрсатган бўлиб чиқяпти.

Россиялик йирик Z-блогерлар бирин-кетин Купянскда назорат тўлиқ бой берилгани, шаҳардаги вазият борасида ҳарбий раҳбариятга нотўғри маълумот етказилаётгани ҳақида ёзяпти. Уларнинг айтишича, бўлинмалар «эгаллаб бўлинган» деб айтилган участкаларда ҳам юзлаб ҳарбийларини йўқотган.

Америкача келишув

Икки ҳафта аввал Беларус президенти Александр Лукашенко 123 нафар маҳбусни озод қилган, улар орасида Беларус мухолифатининг Виктор Бабарико ва Мария Колесникова каби лидерлари ҳам бор эди. Олдинроқ Лукашенко сиёсий рақиби Сергей Тихановскийни ҳам озод қилганди. Бу сиёсий маҳбуслар озод қилинганининг асосий ташаббускори – Доналд Трамп маъмурияти.

Трамп жамоаси сиёсий маҳбуслар озодликка чиқиши учун жиддий тер тўкди. АҚШ нашрларида Лукашенко маҳбусларни озод қилиши учун америкаликлар унга нималар таклиф қилгани ҳақида кулгили тафсилотлар пайдо бўлди. Трамп мулоқотни йўлга қўйиш учун Беларус бўйича бутун бошли махсус вакил – Жон Коулни тайинлаганди. У кўп марта Беларусга бориб, Лукашенко билан дўстлашиб олгани айтилмоқда. Wall Street Journal'нинг ёзишича, улар шунчалик яқин бўлиб кетганки, америкалик дипломат Лукашенкога озиш учун турли уколлар ваъда қилган, улар бирга ароқ ҳам ичибди. Шунингдек, америкаликлар Беларусга «Boeing» самолётлари учун эҳтиёт қисмлар етказиб берилишини айтган экан. Хусусан, Лукашенконинг «Boeing-767» шахcий самолёти учун ҳам.

Россияда портлашлар: генерал ва полициячилар ўлдирилди

Ҳафта давомида Россия пойтахти Москвада иккита портлаш бўлиб, уч киши ҳалок бўлди. Аввалига енгил автомобил портлаши оқибатида генерал-лейтенант Фанил Сарваров ҳалок бўлди. Сарваров оддий генерал эмас, у қуролли кучлар Бош штабида оператив тайёргарлик бошқармасига раҳбарлик қилган. Амалда Украинадаги урушни олиб боришдаги деталларга жавоб берадиган ҳарбий чиновник. Шу сабаб Сарваров ўлими ортида Украина тургани ҳақида версия дарров ўртага чиқди.

Генерал Сарваров ўлдирилган жой яқинида икки кун ўтиб энди ЙПХ машинаси портлади. Оқибатда икки полициячи ҳалок бўлган. Полициячилар «шубҳали шахсни таъқиб қилаётганда» уларнинг машинаси масофадан туриб портлатиб юборилган.

Путин ҳамдардлик билдирди

Москвадаги мактабда ўлдирилган тожикистонлик 10 ёшли Қобилжон Алиев воқеаси бутун МДҲни ларзага солди. Бу воқеа Россиядаги мигрантларга бўлган муносабат масаласини яна кун тартибига қайтарганига қарамай, Путин иштирокида 4,5 соат давом этган «прямая линия» телемулоқотида бирор журналист Россия президентидан бу ҳақда сўрашга жазм қилмади.

Лекин Путин кейинроқ Москвада Тожикистон президенти Имомали Раҳмон билан учрашув бошида Қобилжоннинг ўлими учун тожик халқига ҳамдардлик билдирди. «Ҳалок бўлган боланинг оила аъзоларига самимий ҳамдардлигимни етказишингизни сўрайман», деди Путин Тожикистон президенти билан учрашув аввалида.

Бизда ҳозирча шулар, азизлар. Бу сизга етказмоқчи бўлган хабарларимизнинг охиргиси эди. Боя айтганимдай, бу 2025 йилдаги охирги ҳафталик дайжестимиз бўлди. Умид қиламан, йил давомида сизга яхши хизмат қилдик. Меҳнатимизга рози бўлинг. Бизни қўллаб-қувватлаш учун Kun.uz YouTube-каналига обуна бўлинг. Айтганча, 31 декабр куни йил якунларига бағишланган 2025 йил дайжестини эълон қиламиз. Шундай экан, чоршанбагача! Бизни кузатишда давом этинг, омон бўлинг...

Ўткир Жалолхонов тайёрлади
Тасвирчи ва монтаж устаси – Фахриддин Ҳотамов