Фарғонада суд бошқарувчиси ёрдамчиси пора билан ушланди

Фарғона вилояти Бешариқ туманида суд бошқарувчиси ёрдамчиси ИЧКга оид қарз маблағидан 300 млн сўм ундириб бериш эвазига 4 минг АҚШ доллари талаб қилган. У тезкор тадбирда 48 млн сўм олган вақтида ушланди.

Фото: ДХХ

Фарғона вилоятининг Бешариқ туманида фаолияти тўхтатилган минерал ўғитлар улгуржи савдоси билан шуғулланувчи ишлаб чиқариш кооперативи (ИЧК)га бириктирилган суд бошқарувчиси ёрдамчиси МЧЖга тегишли 1 млрд 502 млн сўм миқдоридаги ҳақдан 300 млн сўмини ундириб бериш эвазига 4 минг АҚШ доллари талаб қилган.

Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ўтказилган тезкор тадбирда у 48 млн сўм олган вақтида ашёвий далиллар билан ушланди.

Ҳозирда мазкур шахсга нисбатан Ўзбекистон Республикаси Жиноят кодексининг 168-моддаси 3-қисми “в” банди билан жиноят иши қўзғатилиб, тергов ҳаракатлари олиб борилмоқда.