Қўшимча функционаллар
-
Тунги кўриниш
Маккада касалхонада ётган ўзбекистонлик ватанга қайтарилди
Ўзбекистоннинг Жидда шаҳридаги бош консулхонаси Макка шаҳридаги Saudi National Hospital шифохонасида даволанаётган андижонлик ҳамюртга ўз вақтида зарур кўмак кўрсатди. Musaffo Travel ва Uzbekistan Airways билан ҳамкорликда бемор Жидда—Тошкент йўналиши орқали ватанга қайтарилди.
Мамлакатнинг Жидда шаҳридаги консулхонаси томонидан Маккадаги Saudi National Hospital шифохонасида даволанаётган ҳамюртга зарур консуллик ёрдами кўрсатилди. Бу ҳақда “Дунё” АА хабар қилди.
Маълум қилинишича, бош консулхона дипломатлари андижонлик юртдошга даволаниши учун яқиндан кўмак бериб, унинг Ўзбекистонга қайтиши билан боғлиқ барча тегишли чора-тадбирларни амалга оширган.
Консуллик вакиллари беморни ватанга қайтариш масаласини Musaffo Travel сайёҳлик фирмаси ҳамда Uzbekistan Airways авиакомпанияси билан ҳамкорликда кўриб чиққан. Хусусан, Musaffo Travel фирмаси унинг касалхонада даволаниши билан боғлиқ молиявий масалаларни тўлиқ ҳал этган, шунингдек, беморнинг турмуш ўртоғининг Маккада яшаши билан боғлиқ харажатларни ҳам қоплаб берган.
Шунингдек, бош консулхона ходимлари беморни шифохонадан Жидда халқаро аэропортига махсус тез тиббиёт ёрдам автомашинасида олиб келиш, уни самолёт бортига чиқариш ишларини ташкил этган.
Қайд этилишича, Musaffo Travel фирмаси ва беморнинг оила аъзолари ҳисобидан Uzbekistan Airways авиакомпаниясининг HY-336 рейси билан “Жидда—Тошкент” йўналиши бўйича авиачипта расмийлаштирилиб, ҳамюртлар ватанга қайтарилган.
Айни пайтда бемор ўз оила аъзолари бағрига қайтиб, Тошкентдаги Республика тез тиббий ёрдам марказида даволанишни давом эттирмоқда.
