Трамп: АҚШ илк бор Венесуэла ҳудудига зарба берди

АҚШ тарихда илк бор Венесуэла ҳудудига зарба берди. Бу ҳақда президент Доналд Трамп душанба куни, 29 декабрда баёнот билан чиқди.

“Наркотиклар билан кемалар юкланадиган портда кучли портлаш содир бўлди, — деди Трамп Флоридада Исроил бош вазири Бинямин Нетаняҳу билан учрашув олдидан. — Биз барча кемаларга зарба бердик, энди эса улар шу ишларни қилиб юрган ҳудудга зарба беряпмиз. У энди йўқ”.

Шу тариқа Трамп 26 декабрда айтган сўзларига изоҳ бериш сўралганида жавоб қайтарди. Ўшанда Ню-Йоркдаги WABC радиостанциясига берган интервюсида республикачӣ шундай деган эди: “Уларда катта завод ёки йирик объект бор — кемалар ўша ердан келади. Икки кун олдин биз уни зарарсизлантирдик”.

АҚШ ҳарбийлари ҳам, Венесуэла ҳукумати ҳам бундай зарба ҳақида расман хабар қилмаган. Илгари АҚШ армияси фақат наркотик ташишда айблаган Венесуэла кемаларига ҳужум қилган. Ҳар бир шундай операция Каракасда кескин танқидга сабаб бўлган.

ОАВ учун МРБ, Оқ уй ва Пентагон қуруқликдаги зарба ҳақида изоҳ беришдан бош тортди. Трамп ҳам қайси куч тузилмаси зарба берганини аниқлаштиришдан бош тортди. Октябрда республикачӣ МРБга Венесуэлада операциялар ўтказишга рухсат берганини айтган эди.

Ижтимоий тармоқларда Маракайбо шаҳрида жойлашган Primazol Insumos Químicos кимё компаниясининг заводида портлаш бўлгани ҳақида хабарлар пайдо бўлган. Бироқ компаниянинг ўзи бу — электр симларидаги носозлик сабаб омборда чиққан ёнғин бўлганини билдирди.

CNN телеканали 30 декабрда манбаларга таяниб хабар беришича, ой бошида МРБ Венесуэла соҳилидаги “узоқроқда жойлашган объект”га дрон орқали зарба берган. У Tren de Aragua наркобандаси томонидан наркотикларни қайиқларга қайта юклаш учун ишлатилган. Амалиётга разведка жиҳатидан қўллаб-қувватлашни АҚШ армияси таркибидаги махсус операциялар кучлари кўрсатган. CNN ёзишича, ҳужум оқибатида қурбонлар бўлмаган.