Ҳар йили 500 нафар иқтидорли ёшлар хориждаги нуфузли олийгоҳларга юборилади

“Ўзбекистон – 2030” стратегияси лойиҳасида ёшларнинг интеллектуал салоҳиятини ошириш ва илмий фаолиятини рағбатлантириш устувор вазифа сифатида белгиланган. Лойиҳада ҳар йили 500 нафаргача истеъдодли ёшлар ва иқтидорли мутахассисларни хорижнинг нуфузли олийгоҳларига ўқишга юбориш режалаштирилмоқда.

Фото: Shutterstock

Стратегия лойиҳасига мувофиқ, ёшларнинг интеллектуал салоҳиятини ошириш ва уларнинг илмий фаолиятини қўллаб-қувватлаш бўйича қатор ташаббуслар назарда тутилган. Шулардан бири сифатида ҳар йили 500 нафаргача истеъдодли ёшлар ва иқтидорли мутахассисларни хорижнинг нуфузли олийгоҳларига ўқишга юбориш режалаштирилган.

Лойиҳада мазкур ташаббус кадрлар тайёрлаш сифатини ошириш, замонавий билим ва кўникмаларни шакллантириш, шунингдек, ёшларнинг глобал таълим ва илмий муҳитга интеграциясини кучайтиришга қаратилгани таъкидланган. Хорижда таҳсил олиш имконияти орқали йўналишлар бўйича илғор тажрибаларни ўзлаштириш, илмий мактаблар билан ҳамкорликни кенгайтириш ва кейинчалик бу билимларни мамлакат тараққиётига татбиқ этиш кўзда тутилади.

Стратегия лойиҳасида ёшлар салоҳиятини ривожлантиришнинг бошқа мақсадлари ҳам қайд этилган. Жумладан, 350 минг нафар ёшнинг интеллектуал салоҳиятини ошириш режалаштирилган. Шунингдек, ёшларни замонавий касблар ва чет тилларига ўқитиш тизимини яратиш доирасида тил ўрганишни қўллаб-қувватлаш дастурлари ҳам кенгайтирилиши кўзда тутилган.

Лойиҳада белгиланган мазкур чоралар иқтидорли ёшларни рағбатлантириш, илм-фан ва таълим сифатига инвестиция киритиш, ҳамда келажакда рақобатбардош мутахассислар корпусини шакллантиришга хизмат қилиши кутилмоқда.