Лукашенко 20 нафар сиёсий маҳбусни афв этди

Лукашенко матбуот хизматига яқин манбага кўра, озод қилинганлар “экстремизм” бўйича айбловлар юзасидан афв сўраб мурожаат қилган ва “қилган ишидан пушаймон бўлган”. Озодликка чиққанларнинг исмлари ҳозирча маълум эмас.

Фото: AP

Беларус раҳбари Александр Лукашенко фармон имзолаб, 22 нафар шахсни афв этди. Бу ҳақда сешанба, 30 декабр куни унинг матбуот хизматига яқин “Пул первого” Telegram-канали хабар қилди. Озод этилганларнинг 20 нафари аввал “экстремистик” моддалар бўйича ҳукм қилинган. Ҳуқуқ ҳимояси билан шуғулланувчи “Вясна” маркази маълумотига кўра, гап сиёсий маҳбуслар ҳақида кетмоқда.

Озодликка 15 нафар аёл ва 7 нафар эркак чиқади, улардан 11 нафарининг вояга етмаган фарзандлари бор. Афв этилганларнинг исмлари очиқланмаган. Улар Беларусдан чиқариб юборилган-йўқми — ҳозирча номаълум. Лукашенко матбуот хизмати даъво қилишича, “уларнинг барчаси давлат раҳбари номига афв этиш ҳақида илтимоснома билан мурожаат қилган, айбини тан олган ва қилган ишидан пушаймон бўлган”.

2025 йил 13 декабр куни Александр Лукашенко ва Беларус бўйича махсус вакил Жон Коул бошчилигидаги АҚШ делегацияси ўртасидаги музокаралардан кейин мамлакат ҳокимияти 123 нафар сиёсий маҳбусни озод қилган эди.

Улар орасида Беларус мухолифатининг етакчиларидан бири Мария Колесникова, Белгазпромбанкнинг собиқ раҳбари ва 2020 йилги президентлик сайловида номзод бўлган Виктор Бабарико, шунингдек “Вясна” ҳуқуқ ҳимоя маркази раҳбари ва Тинчлик бўйича Нобел мукофоти лауреати Алес Беляцкий ҳам бўлган. Уларнинг барчаси Беларус ҳудудидан чиқариб юборилган.

“Вясна” маълумотларига кўра, Беларусда 2024 йил июл ойидан бери афв этиш орқали 569 нафар сиёсий маҳбус озод қилинган. 2025 йилда афв этилган сиёсатчи Николай Статкевич мамлакатни тарк этишдан бош тортганидан кейин уни қайтадан колонияга қайтаришган.

Тайёрлаган: Отабек Матназаров

#Александр Лукашенко #Беларус