Сурияда Асадлар портретисиз янги банкнотлар муомалага киритилди

Сурия ҳокимияти 1 январ, пайшанба кунидан Сурия фунти (Сурия лираси деб ҳам аталади) янги банкнотларини муомалага киритди: уларда 2000 йилдан бери мамлакат президенти лавозимини эгаллаб келган, аммо 2024 йил декабрида исёнчилар томонидан ағдарилган Башар Асаднинг портрети йўқ. Шунингдек, Башар Асаднинг отаси — 1971–2000 йилларда мамлакатни бошқарган Ҳофиз Асад портрети туширилган купюраларнинг янада эскироқ нусхалари ҳам алмаштирилади.

10 дан 500 фунтгача номиналдаги янги банкнотлар 29 декабр куни амалдаги президент Аҳмад аш-Шаръа томонидан тақдим этилди. Уларда атиргуллар, буғдой, зайтун, апелсин ва мамлакатнинг географик ҳамда иқтисодий хилма-хиллигини таъкидловчи бошқа рамзлар тасвирланган. Янгиланган банкнотлардан, шунингдек, икки нол олиб ташланган — янги фунт аввалги 100 фунтга тенглаштирилган.

Деноминация орқали ҳокимият миллий валютага бўлган ишончни тиклашни кўзламоқда: 2011 йилда фуқаролик уруши бошланганидан буён унинг курси бир АҚШ доллари учун 50 фунт атрофидан тахминан 11 минг фунтгача қулаган. Шу сабабли сурияликлар ҳатто озиқ-овқат харид қилиш учун ҳам ўзлари билан жуда катта пул олиб юришга мажбур эди.

Сурия Марказий банки раҳбари Абдулқодир ал-Хасрия янги валюта айнан қаерда босилишига аниқлик киритмади. 2012 йилдан бери Сурия фунтини Россиянинг “Гознак” корхонаси чиқариб келган. Жорий йил май ойида эса ОАВ янги ҳукумат миллий валютани Россияда босишдан воз кечиб, ўрнига Бирлашган Араб Амирликлари (БАА) ёки Германия компаниялари билан ҳамкорликни йўлга қўймоқчи эканини ёзган эди.

Шунга қарамай, август ойи охирида Reuters агентлиги деноминация қилинган янги Сурия фунти купюралари Россияда чиқарилишини хабар қилди. Мос келишув Сурия делегацияси Москвага июл ойи охирида ташриф буюрганида “Гознак” билан тузилган.