Замонавий дунё заиф нуқталари: 6 йиллик глобал рисклар рейтинги

Хавф-хатарларни тушуниш замонавий дунёнинг тизимли заиф томонларини кўришга ёрдам беради. Инфографикада 2020–2025 йиллар давридаги асосий глобал хавф-хатарлар кўрсатилган.

Фото: AP

Рейтингни Парижда жойлашган халқаро суғурта ва инвестиция гуруҳи AXA тайёрлаган. Компания 57 мамлакатдан 3 595 нафар риск-менежмент мутахассисини сўровдан ўтказган.

Экспертлар фикрича, глобал иқлим ўзгариши — сайёра олдида турган энг катта чақириқ. Айнан иқлим билан боғлиқ хавфлар рейтингда олти йил давомида устунлик қилган, фақат 2020 йилда пандемия ва юқумли касалликлар биринчи ўринга чиққан.

2025 йилда пандемия глобал хавф-хатарлар топ-10 рўйхатидан чиқиб кетган. Бироқ рейтингда янги иштирокчи пайдо бўлган — демография, у ҳозирча ўнинчи ўринни эгаллаган.

Олти йил давомида асосий хавфлар орасида киберхавфсизлик ва геосиёсий беқарорлик доимий равишда юқори ўринларда туради. Энергетик хавфлар ҳам рейтингда сақланиб қолган бўлса-да, 2025 йилга келиб саккизинчи ўринга тушган.

Сунъий интеллект топ-10 рўйхатига 2021 йилда кирган. 2023 йилдан бери у барқарор равишда тўртинчи поғонада турибди. Экспертларча, 2025 йилнинг асосий хавфларига, шунингдек, ижтимоий таранглик, табиий ресурслар ва биоранг-баранглик, ҳамда макроиқтисод ва молиявий барқарорлик ҳам кирган.

Тайёрлаган: Отабек Матназаров

#рейтинг #дунё