Трамп Венесуэла мухолифати етакчиси Мачадони Оқ уйда қабул қилади

АҚШ президенти Доналд Трамп пайшанба куни, 15 январда Оқ уйда Венесуэла мухолифатининг етакчиларидан бири, 2025 йил Нобел тинчлик мукофоти лауреати Мария Корина Мачадони қабул қилишни режалаштирмоқда. Бу ҳақда душанба, 12 январ куни CNN телеканали ҳамда AFP ва Reuters агентликлари бир-биридан мустақил равишда хабар қилди — барчаси Оқ уйдаги номи ошкор этилмаган манбаларга таянган.

Аввалроқ, АҚШнинг Венесуэладаги ҳарбий операциясидан кўп ўтмай — у операция натижасида 3 январ куни мамлакат раҳбари Николас Мадуро қўлга олиниб, АҚШга олиб кетилган эди — Доналд Трамп Мачадога Венесуэлани бошқариш қийин бўлишини айтган, чунки унда бунинг учун зарур бўлган халқ қўллови ва ҳурмати йўқ.

Мария Корина Мачадонинг ўзи 5 январ куни Fox News телеканали эфирида шундай деди: у Трампга Нобел тинчлик мукофотини беришни ёки уни у билан бўлишишни истайди, чунки “у қилган иш тарихий” ва “демократик ўзгаришлар сари улкан қадам”дир. Бироқ Норвегия Нобел қўмитаси ўшанда Нобел тинчлик мукофоти “ортга қайтарилиши, бўлиниши ёки бошқа шахсларга ўтказилиши мумкин эмас”лигини тушунтирган.

9 январ куни Трамп CNN эфирида Мария Корина Мачадо билан гаплашишни хоҳлашини айтди. “У (АҚШ Николас Мадурони қўлга олгандан кейин Венесуэлани бошқаришнинг айрим жиҳатларига — таҳр.) жалб қилиниши мумкин. Мен у билан гаплашишимга тўғри келади. Ўйлайманки, унинг келмоқчи экани жуда яхши. Менимча, сабаби ҳам шу”, — деди у.

12 январ куни президент самолёти Air Force One бортида журналистлар билан суҳбатлашар экан, Трамп яна шуни маълум қилди: у Венесуэлада вақтинча президент вазифасини бажараётган Делси Родригес билан ҳам учрашиш ниятида. Унинг сўзларига кўра, унинг маъмурияти Родригес билан “ростдан ҳам яхши” ҳамкорлик қиляпти.

12 январ куни Венесуэладаги янги ҳокимият мамлакатда Николас Мадуро ҳукмронлиги даврида озодликдан маҳрум этилган 116 нафар сиёсий маҳбус озод этилганини эълон қилди. Гап асосан 2024 йилда президент сайловлари сохталаштирилганига қарши бўлган намойишлардан кейин қамалганлар ҳақида кетмоқда.

Шу билан бирга, ҳуқуқни ҳимоя қилувчи ташкилотлар озод қилинганлар сонини тасдиқламаяпти. AFP агентлиги ННТ ва мухолифат маълумотларига таяниб берган ҳисоб-китобларига кўра, 8 январдан бери Венесуэлада тахминан 50 нафар сиёсий маҳбус озод қилинган.

Ҳуқуқни ҳимоя қилувчи ташкилотлар баҳосига кўра, Венесуэладаги сиёсий маҳбуслар сони 800–1200 нафарни ташкил қилади.