Мактабларда “Жадидлар изидан” китобхонлик клублари ташкил этилади

Президент фармонига кўра, 2026 йил 1 февралдан китобхонликни оммалаштириш бўйича “Китоб – маърифат манбаи” дастури амалга оширилади. Шунингдек, давлат органларининг китоб ва китобхонлик мавзусидаги материаллари ижтимоий ахборот (реклама) сифатида тан олиниши қайд этилди.

Ҳужжатда транспорт воситаларида — автобус, метро, самолёт ва поездларда — симсиз ёки мобил интернет тармоғи орқали Mutolaa платформасидан фойдаланиш учун шароит яратиш, қулайлик учун QR-кодлар ўрнатиш вазифаси ҳам белгиланган.

Шу билан бирга, умумтаълим муассасаларида “Жадидлар изидан” китобхонлик клублари ташкил этилади. Клублар фаолияти доирасида:

• аъзолар ўртасида китоб таҳлилига бағишланган дебатлар ўтказилади;
• мактабларда клуб аъзоларига йилига камида 20 та китоб ўқитиб борилади;
• ҳар чоракда туман (шаҳар) кесимида энг фаол клуб аъзолари рағбатлантирилади.