Полша тўрт украин ва бир россияликни диверсияларда айблади

Полша миллий прокуратураси авиаюк ташиш инфратузилмасига қарши диверсия ҳаракатлари бўйича иш доирасида тўрт нафар Украина фуқароси ва бир нафар РФ фуқаросига айблов қўйди. Бу ҳақда идора сайтида жума куни, 16 январда хабар қилинди. Гап почта орқали ташиш жараёнида ёки саралаш-транзит марказларида ёнғин чиқарадиган посилкаларни юбориш ҳақида кетмоқда.

Айбловлар Полша жиноят кодексининг Россия махсус хизматлари топшириғи билан диверсия тайёрлаш, портловчи ёки ёнувчан моддалардан фойдаланиш ва мулкни йўқ қилиш, шунингдек самолёт ҳалокатига сабаб бўлишга уриниш ҳақидаги моддаларига таянади. Бу эҳтимолий ҳаракатларнинг барчаси террористик деб таснифланган. Айбланувчиларга умрбод қамоқ жазоси таҳдид қилмоқда.

Терговчилар аниқлашича, 2024 йил июн–август ойлари оралиғида айбланувчилар DPD ва DHL каби курерлик хизматлари орқали ёндириш қурилмалари ниқобланган воситалар, шунингдек ёнувчан ва портловчи моддалар бўлган посилкаларни тайёрлаб, жўнатган. Бу моддалар кундалик маиший буюмлар ичига, жумладан массаж ёстиқчалари ва косметика воситалари қутиларига яширилган. Посилкалар Вилнюсдан Варшава, Лондон, Бирминҳем, шунингдек АҚШ ва Канадага юборилган.

Пресс-релизда айтилишича, диверсиялар оқибатида юк контейнерлари, фура учун битта тиркама ва курерлик етказиб бериш хизмати орқали жўнатилган кўплаб посилкалар зарар кўрган, бу эса логистика ва суғурта компанияларига катта молиявий зарар етказган.

Полша томонига кўра, диверсияларнинг мақсади — ЕИ ва Буюк Британиянинг логистика ҳамда авиаюк ташиш инфратузилмасини издан чиқариш, шунингдек Украинадаги уруш муносабати билан жамоатчилик ва сиёсий кайфиятга таъсир ўтказиш бўлган.

Тергов давомида яна бир Россия фуқароси — Ярослав М.га нисбатан ҳам шунга ўхшаш айблов қўйиш учун етарли далиллар тўплангани айтилган. У миллий ва халқаро қидирувга берилган. Полша ҳокимияти уни экстрадиция қилиш ҳақидаги сўровни Озарбойжонга юборган.

Аввалроқ, 13 январ куни Германияда ҳам икки нафар украинга РФ топшириғи билан диверсия тайёрлаганлик айби қўйилган эди. Тергов версиясига кўра, Владислав Т. ва Даниил Б. логистика йўналишлари ҳақида маълумот тўплаш мақсадида Кёлндан Украинага GPS-трекерлар солинган посилкалар жўнатган, кейин эса шу йўналишлар бўйлаб портловчи қурилмалар бўлган посилкаларни юборишни режалаштирган.

Бу посилкалар йўлда портлаши керак бўлган, жумладан эҳтимол Германиянинг ўзида ҳам — “имкон қадар кўпроқ зарар етказиш ва аҳолидаги хавфсизлик ҳиссини заифлаштириш” учун, дейилади Германия федерал прокуратураси баёнотида.

Идора Владислав Т. ва Даниил Б.га нисбатан Штутгарт шаҳридаги олий ер судига (Higher Regional Court) жосуслик, диверсия тайёрлаш ва ўт қўйиш мақсадида тил бириктириш бўйича айблов тақдим этган. Бу ишдаги учинчи гумонланувчи — Евгений Б. яқинда Швейцариядан Германияга экстрадиция қилинган ва у ҳам, эҳтимолий шериклари каби, судга қадар ҳибсда сақланмоқда. Яқин вақт ичида унга ҳам айблов қўйилиши кутилмоқда.