Финалда драма. Сенегал майдонни ташлаб кетди, лекин қайтиб чемпионга айланди

Сенегал – Африка чемпиони! Ва бу ақл бовар қилмас финалда рўй берди. Сенегалликлар ўйин охирида ҳакам қароридан норози бўлиб, майдонни ташлаб кетишди, аммо Садио Маненинг илтимоси билан қайтишди – ва Эдуард Менди паненка услубидаги пеналтини қайтарди. Кейин эса Сенегал овертаймда гол уриб, совринни қўлга киритди.

Сенегал – Марокаш 1:0
Гол: Гуйе, 94 (1:0)
Аниқ ижро этилмаган пеналти: Диас, 90+24’
Сенегал: Э. Менди, М. Сарр, Ниакате, Диуф (Якобс, 106), А. Менди (Сек, 77), Гана Гуйе, Гуйе, Камара (И. Сарр, 77), Мане, И. Ндиай (Мбай, 77), Жексон (Ш. Ндиай, 90)
Марокаш: Буну, Агерд, Масина (Ал-Ямиқ, 89), Мазравий (Игаман, 98), Ҳакими, Ал-Айнавий, Сайбари (Салоҳиддин, 90+4), Ал-Ҳаннус (Таргаллин, 80), Аззалзулий, Диас (Аҳомаш, 98), Ал-Кааби (Ан-Носирий, 80)
Огоҳлантиришлар: Камара, 24. И. Сарр, 90. Диуф, 90. Э. Менди, 90. М. Сарр, 113 – Салоҳиддин, 90. Ан-Носирий, 112

Сенегалликлар баҳсли пеналтига чидай олишмади. Фақат Мане ўйнашда давом этишга ундади ва унинг саъй-ҳаракатлари бекор кетмади!

Бош ҳакам иккинчи бўлимга роппа-роса саккиз дақиқа қўшиб берди, амалда эса қўшимча дақиқалар узоқ давом этди (110-дақиқагача).

Аввалига, 92-дақиқада сенегалликлар гол уришганди, аммо гол бекор қилинди: бурчак зарбасидан кейин дарвозани ишғол этишидан олдин Абдулайе Сек тўп учун курашда Ашраф Ҳакимини туртиб юборган деб топилди.

96-дақиқада эса Браим Диас рақиб жарима майдонида бурчак зарбасидан кейин Диуф билан тўп учун курашда газонга йиқилди. VAR реферини монитор қаршисига чорлади ва якунда пеналти белгиланди.

Шундан кейин сенегалликлар қаттиқ эътироз билдира бошлашди. Бир неча дақиқа ўтиб Сенегал миллий жамоаси футболчилари намойишкорона майдонни тарк эта бошлади. Сенегалликлар устози Пап Тиав ҳам сўнгги дақиқалардаги баҳсли пеналти туфайли қаттиқ норози бўлди ва жамоасига майдонни тарк этишни буюрди.

Николас Жексон эса рақиб футболчилари билан муштлашиб кетишига бир бахя қолди.

Якунда Садио Манедан бошқа барча сенегалликлар майдондан чиқиб кетишди. Бош мураббий ҳам уйга қайтиш керак деб ҳисоблаганида, жамоа сардори ўйнашда давом этишга ундади. 

Маненинг майдонда қолиш кераклиги ҳақидаги чақириқларига ҳеч ким қулоқ солмади, шундан кейин у жамоадошларини олиб келиш учун кийим алмаштириш хонасигача боришига тўғри келди. Ва якунда улар қайтишди. Аммо бу ҳали ҳаммаси эмасди.

Браим Диас 114-дақиқада пеналтини «паненка» услубида ижро этди – бу эса Менди учун осон ўлжага айланди. У жойидан қимирламасдан ўзига келган тўпни эгаллаб олди. Бу футбол тарихидаги энг ёмон «паненка» эди.

Шундан кейин ўйин қўшимча бўлимларга ўтди ва у ерда руҳий устунлик Сенегал томонда эди. Диас биринчи овертаймдаёқ алмаштирилди – ўйин антиқаҳрамони майдонни кўзда ёш билан тарк этди.

Бундан бир неча дақиқа олдин сенегалликлар ҳеч ким бекор қила олмайдиган голни уришганди – Мане майдоннинг иккинчи қисмида тўпни эгаллаб олиб, жамоасининг қарши ҳужумини бошлаб берди. Пап Гейе эса Ҳакимидан қочиб кетди ва тўпни дарвоза тўсини остидан тўрга киритди.

Қолган дақиқаларда марокашликлар Менди қўриқлаётган дарвозани қамал қилишди, Сенегал эса сўнгги кучлари билан ҳимояланишди. Вазиятлардан бирида Агер бурчак зарбасидан кейин бош билан зарба йўллаганида омад яна сенегалликларга кулиб боқди ва тўп тўсинга борди.

Сенегалликлар уюштирган навбатдаги қарши ҳужум ҳам хавфли чиқди: лекин Ндиайе дарвозабон ҳудудидан туриб тўғри зарба беролмади.

Якунда Сенегал ғалабали ҳисобни ушлаб қолди ва ўз тарихида иккинчи бор Африка кубоги ғолибига айланди.

Браим Диас энг яхши тўпурар сифатида олтин бутсани, Буну энг яхши дарвозабон сифатида олтин қўлқопни қўлга киритди, аммо турнирнинг энг яхши футболчиси учун соврин Садио Манега, асосий кубок эса Сенегал жамоасига топширилди.

Сенегалда тўрт йил ичида иккинчи Африка кубоги. Марокаш 1976 йилдан буён ғалаба қозона олмайди

● Сенегалликлар тўрт йил ичида иккинчи бор Африка чемпионига айланишди. Улар сўнгги тўрт турнирдан учтасида финалга чиқишган.

● Сенегал бу турнир бошланганидан буён атиги икки бор тўп ўтказиб юборди. Гуруҳда Конго Демократик Республикаси билан ўйинда (1:1) ва 1/8 финалда Судандан (3:1). Кейин эса қаторасига уч ўйинда 1:0 ҳисобларида ғалаба қозонилди.

● Марокашликлар 1976 йилдан буён Африка кубогини қўлга кирита олмаяпти. Уйда ғалаба қозониш учун идеал имконият бўлганди, аммо муваффақиятсиз серия давом этадиган бўлди. Марокашликлар 2004 йилда ҳам финалда ютқазган.

● Марокаш сўнгги 24 ўйинда илк бор ютқазди. Африка кубогида жамоа фақат гуруҳ босқичининг иккинчи турида Мали билан ўйинда (1:1) очко йўқотган.

● Африка кубоги финалларида 1:0 ҳисоблари – классикага айланиб улгурди. XXI аср бошидан буён 12 финалдан тўққизтасида кўпи билан битта гол урилган. Беш финалнинг асосий вақти 0:0, тўрттаси – 1:0 ҳисобларида якунланган.

Ушбу жамоалар учун кейинги халқаро турнир ярим йилдан кейин бўлиб ўтади. ЖЧ-2026 турнирига Сенегал ҳам, Марокаш ҳам йўлланма олган.