Мобил иловаларда P2P ўтказмалар учун янги қоидалар жорий этилди

Янги низомга мувофиқ, мобил иловадаги аккаунтга фақат фойдаланувчининг ўзи ёки яқин қариндошларига тегишли банк карта/ҳисобварағи/электрон ҳамённи бириктиришга рухсат берилади. Шунингдек, телефон рақами — ЖШШИР мослиги текширилади, биометрик идентификацияда “ҳаётийлик” талаби қўйилади ва бир қатор автоматик ҳимоя механизмлари ишлайди.

Ўзбекистон Марказий банки жисмоний шахсларга масофадан молиявий хизматлар кўрсатишда киберхавфсизлик бўйича янги талабларни тасдиқлади. Тегишли ҳужжат Адлия вазирлиги томонидан давлат рўйхатидан ўтказилди ва 3 ойдан кейин кучга киради.

Унга кўра, мобил иловада рўйхатдан ўтган фойдаланувчи ўз аккаунтига фақат ушбу шахснинг ўзига ёки яқин қариндошларига тегишли бўлган банк ҳисобварағи, банк картаси ҳамда электрон ҳамёнларни бириктириши ва шу аккаунт орқали P2P ўтказмаларини амалга ошириши мумкин бўлади.

Бунда фойдаланувчининг телефон рақами ва ЖШШИРи ўзаро мос келиши алоҳида текширилади. Агар мослик аниқланмаса, мобил иловада рўйхатдан ўтказиш ҳамда банк картасини бириктиришга йўл қўйилмайди.

Кредит ва тўлов ташкилотлари биометрик идентификация жараёнида “ҳаётийлик факторлари”ни аниқлаши шарт. Яъни, расм орқали идентификация қилиш (сурат кўрсатиб тасдиқлаш) имкони бўлмайди.

Шунингдек, хавфсизликни кучайтириш мақсадида қуйидаги чекловлар назарда тутилган:

телефонга юборилган 1 марталик СМС-код 3 марта нотўғри киритилса, фойдаланувчининг мобил иловадаги ҳаракатлари 15 дақиқага вақтинча чекланади;
аккаунтга бошқа қурилмадан кириш ёки паролни қайта тиклаш жараёнида аккаунтга боғланган барча банк карталари мобил иловадан автоматик тарзда чиқариб юборилади;
шу қурилмада банк карталари бўйича молиявий операциялар тарихи ўчириб юборилади.

Қайд этилишича, банк карталарини қайта бириктириш фақат биометрик идентификациядан ўтган ҳолда амалга оширилади.

Тайёрлаган: Отабек Матназаров

#фирибгарлик #банк картаси #банк #P2P