Берлин ва Бранденбургда Россиянинг эҳтимолий агентлари ушланди

Тергов версиясига кўра, 2016 йилдан буён икки эркак Германиядан “ДХР” ва “ЛХР” деб аталувчи тузилмаларга гуманитар юклар ва тиббий товарлар, шунингдек учувчисиз аппаратлар (дронлар) юбориб турган ташкилотда раҳбар лавозимларини эгаллаб келган. Айтилишича, Сурен А. маҳаллий қуролли тузилмалар учун юкларни ташиш харажатларини молиялаштирган.

Прокуратура маълумотига кўра, Фалко Х. етказиб бериш буюртмаларини қабул қилган ва юкларни жойида тақсимлашда иштирок этган. ARD маълумотларига кўра, ташкилот Friedensbrücke-Kriegsopferhilfe — “Тинчлик кўприги — уруш қурбонларига ёрдам” деб аталади. 22 январ куни ушланганлар тергов судяси олдига олиб келинади, у уларни ҳибсга олиш ҳақида қарор чиқариши мумкин.

Шу куни Берлинда немис ва украин фуқаролигига эга бўлган аёл Россия махсус хизматлари учун ишлаганликда гумон қилиниб қўлга олинди. Федерал прокуратура маълумотларига кўра, Илона В. Россия разведкасидан бўлган кураторига РФнинг Украинага қарши урушига тааллуқли маълумотларни узатиб келган. Бундан ташқари, у эҳтимол, шахсан таниган ГФР Мудофаа вазирлигининг собиқ ходимлари билан ҳам мулоқот қилган.

Илона В.нинг квартирасида, шунингдек Бранденбург, Рейнланд-Пфалц ва Баварияда яна икки нафар гумонланувчига тегишли уй-жойларда тинтув ўтказилди. Қолган икки нафар фигурант ҳозирча озодликда қолмоқда.

Илона В. хорижий разведка манфаатлари учун фаолият олиб борганликда гумон қилинмоқда. Прокуратура маълумотига кўра, у сиёсий тадбирлар иштирокчилари ҳақида маълумот тўплаган, шунингдек мудофаа объектларининг жойлашуви, дронлар синовлари ва Украинага дронлар етказиб бериш режалари ҳақида ҳам ахборот олган.

Германия Федерал прокуратураси “Донецк халқ республикаси” ва “Луханск халқ республикаси” деб аталувчи тузилмаларни террористик ташкилотлар сифатида таснифлайди. Ушбу Украина ҳудудлари 2014 йил баҳорида Москва назоратидаги кучлар томонидан эгаллаб олинган.