Berlin va Brandenburgda Rossiyaning ehtimoliy agentlari ushlandi

Tergov versiyasiga ko‘ra, 2016 yildan buyon ikki erkak Germaniyadan “DXR” va “LXR” deb ataluvchi tuzilmalarga gumanitar yuklar va tibbiy tovarlar, shuningdek uchuvchisiz apparatlar (dronlar) yuborib turgan tashkilotda rahbar lavozimlarini egallab kelgan. Aytilishicha, Suren A. mahalliy qurolli tuzilmalar uchun yuklarni tashish xarajatlarini moliyalashtirgan.

Prokuratura ma’lumotiga ko‘ra, Falko X. yetkazib berish buyurtmalarini qabul qilgan va yuklarni joyida taqsimlashda ishtirok etgan. ARD ma’lumotlariga ko‘ra, tashkilot Friedensbrücke-Kriegsopferhilfe — “Tinchlik ko‘prigi — urush qurbonlariga yordam” deb ataladi. 22 yanvar kuni ushlanganlar tergov sudyasi oldiga olib kelinadi, u ularni hibsga olish haqida qaror chiqarishi mumkin.

Shu kuni Berlinda nemis va ukrain fuqaroligiga ega bo‘lgan ayol Rossiya maxsus xizmatlari uchun ishlaganlikda gumon qilinib qo‘lga olindi. Federal prokuratura ma’lumotlariga ko‘ra, Ilona V. Rossiya razvedkasidan bo‘lgan kuratoriga RFning Ukrainaga qarshi urushiga taalluqli ma’lumotlarni uzatib kelgan. Bundan tashqari, u ehtimol, shaxsan tanigan GFR Mudofaa vazirligining sobiq xodimlari bilan ham muloqot qilgan.

Ilona V.ning kvartirasida, shuningdek Brandenburg, Reynland-Pfals va Bavariyada yana ikki nafar gumonlanuvchiga tegishli uy-joylarda tintuv o‘tkazildi. Qolgan ikki nafar figurant hozircha ozodlikda qolmoqda.

Ilona V. xorijiy razvedka manfaatlari uchun faoliyat olib borganlikda gumon qilinmoqda. Prokuratura ma’lumotiga ko‘ra, u siyosiy tadbirlar ishtirokchilari haqida ma’lumot to‘plagan, shuningdek mudofaa obektlarining joylashuvi, dronlar sinovlari va Ukrainaga dronlar yetkazib berish rejalari haqida ham axborot olgan.

Germaniya Federal prokuraturasi “Donetsk xalq respublikasi” va “Luxansk xalq respublikasi” deb ataluvchi tuzilmalarni terroristik tashkilotlar sifatida tasniflaydi. Ushbu Ukraina hududlari 2014 yil bahorida Moskva nazoratidagi kuchlar tomonidan egallab olingan.