Трамп Давосда: Украинада тинчликка НАТО ва ЕИ эришиши керак

АҚШ президенти Доналд Трамп Давосда ўтаётган Жаҳон иқтисодий форуми (ЖИФ)да Россиянинг Украинага қарши урушини тезроқ тугатишга чақирди. Унинг айтишича, Украинада вазиятни тинч йўл билан ҳал этиш чораларини Европа давлатлари ва НАТО кўриши керак, чунки АҚШ бу низодан узоқда жойлашган. Трамп бу ҳақда чоршанба куни, 21 январда билдирди.

Фото: REUTERS/Romina Amato

“АҚШ узоқда. Бизни ундан катта, гўзал океан ажратиб туради. Бунинг бизга ҳеч қандай алоқаси йўқ”, — деди у. Трампнинг сўзларига кўра, Украинадаги урушни тўхтатиш йўлидаги саъй-ҳаракатлар “АҚШга фойда келтирмайди”.

“Бир йилдан бери мен шу уруш устида ишлаяпман, шу вақт ичида яна саккизта бошқа можарони ҳал қилдим. Ҳиндистон — Покистон, ва бошқа урушлар. Арманистон — Озарбойжон”, — деб санаб ўтди у.

Шу билан бирга, Трамп таъкидлашича, АҚШ бу саъй-ҳаракатлардан ҳеч нарса олмаяпти. “Биз нима оляпмиз? Ўлимдан, вайронагарчиликдан ва улкан пул маблағларидан бошқа — бу пуллар биз берган ёрдамни қадрламайдиган одамларга кетяпти. Мен НАТО ҳақида гапиряпман. Мен Европа ҳақида гапиряпман. Украина билан улар шуғулланиши керак, биз эмас”, — деб урғу берди у.

Трампнинг айтишича, Россиянинг Украинага қарши уруши “Иккинчи жаҳон урушидан бери энг даҳшатлиси”. “Агар у давом этса, кўлами жиҳатидан уни ҳам ортда қолдиради. Йўқотишлар рақамлари ҳайратланарли. Улар бу ҳақда гапиришни истамайди. Украина ҳам, Россия ҳам жуда кўп одам йўқотди”, — деди у.

АҚШ раҳбари, шунингдек, Россия президенти Владимир Путин ҳам, Украина президенти Володимир Зеленский ҳам урушни тугатиб, тинчлик келишувини имзолашни хоҳлаётганига ишонч билдирди. “Мен президент Путин билан ишлаяпман ва менимча, у битим тузишни хоҳлаяпти. Мен президент Зеленский билан ишлаяпман ва менимча, у ҳам битимни хоҳлайди. Мен у билан бугун учрашаман”, — деди у.