Путин Кремлда Трампнинг вакиллари билан учрашди

АҚШ президенти Доналд Трампнинг вакиллари — унинг махсус элчиси Стив Уиткофф, Оқ уйнинг катта маслаҳатчиси Жош Грюнбаум, шунингдек Трампнинг куёви Жаред Кушнер пайшанба куни, 22 январда Кремлда ёпиқ эшиклар ортида Россия президенти Владимир Путин билан учрашиб, РФ томонидан Украинага қарши бошланган урушни тўхтатиш йўлларини навбатдаги марта муҳокама қилди. 2017 йил январидан 2021 йил январигача Трампнинг катта маслаҳатчиси лавозимида ишлаган Кушнер ҳозир АҚШ маъмуриятида расмий лавозимга эга эмас, бироқ у қайнотасига таъсирини сақлаб қолган ва Оқ уйнинг дипломатик ҳамда сиёсий ташаббусларида иштирок этади.

Грюнбаум — АҚШ Умумий хизматлар маъмурияти таркибидаги Федерал харидлар хизмати комиссари бўлиб, Трамп томонидан яқинда ташкил этилган “Тинчлик кенгаши”нинг катта маслаҳатчиси этиб тайинланган, у музокараларда биринчи марта қатнашди.

Кремл матбуот хизматига кўра, суҳбат 3 ярим соатдан ортиқ давом этган. Россия томонидан унда Путиндан ташқари унинг ёрдамчиси Юрий Ушаков ҳамда РФ президентининг махсус вакили, Россия тўғридан тўғри инвестициялар жамғармаси (РТИЖ) бош директори Кирилл Дмитриев иштирок этган. Кутилишича, ушбу музокаралар якунлари бўйича Ушаков ОАВ учун телефон орқали брифинг ўтказади.

Уиткофф ва Путин ўртасидаги шунга ўхшаш олдинги учрашув 2025 йил декабри бошларида бўлиб ўтган эди. Ўшанда музокаралар беш соат давом этган, аммо катта ютуқ келтирмаган, деб эсга олади dpa агентлиги.

ТАСС агентлиги Путиннинг ушбу учрашув арафасидаги баёнотларига таяниб хабар беришича, томонлар бошқа масалалар қатори Трамп Фаластин-Исроил ва бошқа можароларни ҳал этиш учун ташкил этган “Тинчлик кенгаши”га Россияни таклиф қилиш, шунингдек АҚШ ҳудудида музлатилган Россия активларининг тақдири ҳақида ҳам гаплашишни режалаштирган.

Бундан олдин, 21 январ куни Путин РФ мазкур активлардан “Тинчлик кенгаши”га 1 млрд доллар йўналтириши, қолган қисмини эса Россиянинг Украинага қарши уруши давомида зарар кўрган ҳудудларни тиклашга бериш мумкинлигини айтган. Гап Киев назоратидаги ҳудудлар ҳақида кетяптими ёки Россия томонидан оккупация қилинган ҳудудлар ҳақидами — Россия президенти аниқ айтмаган.

Кутилишича, Украинада тинчлик йўлидаги келишув бўйича музокаралар 23 январ куни Абу-Дабида давом этади. Узоқ вақтдан бери биринчи марта у ерда Москва ва Киев вакиллари бевосита учрашади. АҚШ эса воситачи сифатида иштирок этади.