Зеленский: “АҚШ билан хавфсизлик кафолатлари бўйича келишдик”

Украина раҳбарининг айтишича, хавфсизлик кафолатлари мавзуси “ёпилди”. “Ҳужжат томонлар — президентлар томонидан имзоланиши, кейин эса миллий парламентларга ратификация учун юборилиши керак”, — деди Зеленский.

Трамп билан музокаралардан кейин у яна бир бор Украина учун хавфсизлик кафолатлари тизими АҚШ иштирокисиз мумкин эмаслигини таъкидлади. Зеленскийнинг айтишича, Буюк Британия ва Франция эҳтимолий ўт очишни тўхтатиш режими амалга ошириладиган жойда назоратни таъминлашга тайёрлигини билдирган, аммо “АҚШсиз хавфсизлик кафолатлари ишламайди”.

Зеленский, шунингдек, Украина шарқий ҳудудларининг келажагига оид масалалар ҳали ҳал бўлмаганини айтди. “Гап мамлакатимизнинг шарқий қисми, ер ҳақида кетяпти. Бу биз ҳали ҳал қилмаган масала”, — деди у. Унинг фикрича, бу мавзуни АҚШ махсус вакили Стив Уиткофф муҳокама қилган бўлиши мумкин.

Бундан олдин, шу куни Уиткофф можарони тартибга солиш бўйича музокаралар илғор босқичда эканини, Киев ва Москва ўртасида “фақат битта муаммо” қолганини айтган эди. У аниқ тафсилотларни очиқламаган. Уиткофф бу баёнот пайтида Москвада бўлган.

Россия Украина ҳудудининг тахминан 20 фоизини назорат қилаётгани айтилади ва эҳтимолий келишув доирасида Донбасс устидан тўлиқ назоратни талаб қилмоқда. Киев бу талабларни рад этади.

Россия—Украина урушига якун ясаш учун фаол дипломатик уринишлар бир неча ойдан бери давом этмоқда. Музокараларда АҚШ илк бор таклиф қилган тинчлик режасининг янгиланган варианти кўриб чиқилмоқда.

Пайшанба куни Зеленский АҚШ, Украина ва Россия вакиллари ўртасида БААда музокаралар бўлишини ҳам маълум қилди.