Канада Трампнинг Хитой билан келишув ҳақидаги танқидини рад этди

Канада бош вазири Марк Карни АҚШ президенти Доналд Трампнинг Оттава Хитой билан савдо келишуви тузса, жазо тариқасида божхона тўловларини жорий этиши мумкинлиги ҳақидаги таҳдидларига жавоб берди. Карнининг айтишича, Канада Хитой билан эркин савдо тўғрисидаги келишувга эришишни кўзламаяпти, чунки бундай келишув АҚШ, Мексика ва Канада томонидан Трампнинг биринчи президентлик даврида имзоланган Шимолий Америкада эркин савдо тўғрисидаги шартнома (USMCA)га зид бўлар эди. Карни буни якшанба, 25 январ куни Оттавада журналистларга маълум қилди.

Унинг сўзларига кўра, Хитой билан бўлган келишувлар фақат Канада–Хитой савдосидаги муаммоли масалаларга тааллуқли эди. “Биз сўнгги бир неча йилда пайдо бўлган Хитой билан боғлиқ айрим муаммоларни тузатдик”, — деди Карни. У бу ўринда Хитойда ишлаб чиқарилган электромобиллар, қишлоқ хўжалиги маҳсулотлари ва балиқ маҳсулотларини мисол қилиб келтирди. Шунингдек, у Канада USMCA келишуви бўйича “ўз мажбуриятларини ҳурмат қилишини” таъкидлади.

Бундан олдин Трамп Канада Хитой билан савдо келишуви тузса, унга нисбатан 100 фоизлик савдо божлари киритиш билан таҳдид қилган эди. У Truth Social платформасида шундай деб ёзди: агар Марк Карни Канада АҚШга йўналтирилган Хитой товарлари учун транзит нуқта бўлиши мумкин, деб ҳисобласа, у қаттиқ янглишяпти. Трампнинг фикрича, “Хитой Канадани тириклайин ютиб юборади, уни бутунлай ўз ичига олади ва унинг бизнесини, ижтимоий тузилмасини ҳамда умуман ҳаёт тарзини вайрон қилади”.

Январ ўртасида Пекинга ташриф ва ХХР раиси Си Жинпинг билан учрашув чоғида Канада бош вазири Хитой билан “янги стратегик шериклик” ҳақида, шунингдек, икки мамлакат ўртасида савдо тўсиқларини бартараф этиш ва тарифларни пасайтиришга қаратилган инновацион келишув тўғрисида маълум қилган.

АҚШ, Мексика ва Канада ўртасида эркин савдо тўғрисидаги келишув 2018 йил ноябрда уч давлат раҳбарлари томонидан имзоланган. Трамп 1994 йилдан амал қилиб келган NAFTA келишувини АҚШ учун фойдали эмас, деб ҳисоблар эди.